Бэрээдэк Маны аах

Нерюнгри олохтооҕо түөкүттэргэ албыннаппыт

Нерюнгри олохтооҕо түөкүттэр угаайыларыгар киирэн биэрбит.

Киниэхэ +7 939-999-73-01 төлөпүөнтэн эрийбиттэр. Төлөпүөнүнэн кэпсэтэр киһи эргиэн, үп-харчы тэрилтэтин исписэлииһэбин диэн бэйэтин билиһиннэрбит. «Исписэлиис» сэһэргэһээччитигэр аахсыйалары атыылаан «DeepForex» торговай биржаҕа хайдах чэпчэкитик уонна түргэнник харчылаһыахха сөбүн кэпсээбит. Бу туһунан СӨ ИДьМ саайтыгар суруллар.
Бу киһи албын этиигэ сөбүлэспит. Инньэ гынан, маҥнай 8 000 солк. кирэдьиит ылан укпут. Салгыы үп-харчы эпэрээһийэтигэр эбии харчы угуута наада буолан турбут. Маныаха бу киһи өссө 240 000 солкуобайы кирэдьиит ылан, бу фирма счетугар укпут. Бу кэм устатыгар кини «биржа исписэлиистэрин» ыйыыларынан сорудаҕы толорбут. Оттон сарсыҥҥытыттан киниэхэ сибээскэ тахсыбат буолан хаалбыттар.  Оттон бу ночооттоох хаалааччы баантан ылбыт иэһин, 248 000 солкуобайы, түөкүттэргэ биэрбит.
«Ытыктабыллаах гражданнар! Интэриниэтинэн түргэнник уонна чэпчэкитик харчылаһар туһунан этиигэ итэҕэйимэҥ. Аферистар дьонтон элбэх харчыны хайдах албыннаан ылар туһуттан, араас схеманы толкуйдууллар. Мунньуммут харчыгытыттан мэлийбэт туһуттан, араас саарбах эргиэн биржаларыгар, үп-харчы пирамидаларыгар киирбэккитигэр сүбэлиибит», — диэн ИДьМ Нерюнгритааҕы салаата сэрэтэр.
0
0
Telegram @edersaas20