Нерюнгри куорат уу ситимин уонна канализацияны саҥардан оҥорууга 1 млрд солк. тахса үбү ылыаҕа
Нерюнгри куорат уу ситимин уонна канализацияны саҥардан оҥорууга 1 млрд солк. тахса үбү ылыаҕа
Дойду национальнай туруктаах буолуутун пуондатыттан Нерюнгри куорат уу ситимин уонна канализация хаһаайыстыбатын саҥардан оҥорууга 1,03 млрд солк. көрүөхтэрэ.
Саха сирин баһылыга Айсен Николаев вице-премьер Марат Хуснуллин бэрэссэдээтэллээх эрэгийиэннээҕи сайдыыга бырабыыталыстыба хамыыһыйатын президиумун мунньаҕар кытынна.
Мунньах түмүгүнэн Нерюнгри уу ситимин уонна канализация хаһаайыстыбатын тутууларын саҥардан оҥоруу иккис түһүмэҕэр 1,03 млрд солкуобай кээмэйдээх үбү (иэһи) Туруктаах буолуу национальнай пуондаттан биэрэргэ Саха сирин сайаапката бигэргэннэ.
“Нерюнгри оройуона кэнники сылларга тэтимнээхтик сайдар, ол иһигэр биһиэхэ федеральнай киин биэрэр көмөтүнэн. Былырыын биһиги “Р” тутуллар кыбаарталга инженернэй ситими тардарга инфраструктураҕа бүддьүөт кирэдьиитин ылбыппыт. Билигин бу ылбыт үппүтүнэн уу турбата-ситимэ саҥардыллыаҕа уонна олохтоохтор хаачыстыбалаах хомунаалынай өҥөнөн туһаныахтара”, — диэн Айсен Николаев бэлиэтээтэ.
Үлэ 2022-2024 сылларга ыытыллыаҕа. Бу көмөтүнэн ОДьКХ эбийиэктэрин эргэриитэ аччыаҕа, уу ситимин үлэтэ тупсуоҕа уонна тулалыыр эйгэҕэ буортуну оҥоруута кыччыаҕа.
Сайаапканы дьүүллэһиигэ вице-премьер уонна бырабыыталыстыба хамыыһыйатын бэрэссэдээтэлэ Марат Хуснуллин бу бырайыак дьоһун суолтатын бэлиэтээтэ: “Нерюнгри сайдыаҕа. Уһук Илин сайдыытыгар уонна үлэ миэстэтин тэрийиигэ бырабыыталыстыба бэбиэскэтигэр турар”.
Нерюнгри куорат уонна Серебрянай Бор бөһүөлэк уунан хааччыллыылара сир анныттан ылыллар – Омулинскай, Үөһээ Нерюнгритааҕы уонна Нерюнгритааҕы. Бу тутуулар өссө 1970-с сыллардаахха куорат саҥа тутуллан эрдэҕинэ оҥоһуллубуттара. Онон эбийиэктэр олус эргэрдилэр.
Санаттахха, бу иннинэ бырайыак бастакы түһүмэҕин олоххо киллэриигэ Саха сирин экэниэмикэтин сайдыытын кииннэрин социальнай сайдыыга былааннарынан 400 мөлүйүөн солк. көрүллүбүтэ, ол иһигэр 396 мөл солк. – федеральнай бүддьүөттэн, 4 мөл – өрөспүүбүлүкэттэн. Бу үбүнэн Омулинскайдааҕы водозаборга сир аннынааҕы ыраас уу икки резервуара уонна Нерюнгритааҕы уонна Үөһээ Нерюнгритааҕы водозабордар носуос ыстаансыйалара саҥардыллыбыттара.
Бырайыак иккис түһүмэҕин хапытаалынай ороскуотун кээмэйэ 1,2 млрд солк. тахса, ол иһигэр 1 млрд солк. тахсата – иэс харчыта.
Ону тэҥэ былырыын Саха сирэ дойдуга биир бастакынан Дьокуускай уонна Нерюнгри куораттарыгар тутуллар киһи олорор оройуоннарыгар инженернэй ситими тардыыга инфраструктураҕа бүддьүөт кирэдьиитин ылбыта. 2022 сылга өрөспүүбүлүкэҕэ бу кирэдьиит уопсай сууматыттан 55 бырыһыана угуллуоҕа (үп сорҕото 2023 сылга киириэҕэ).
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан