Маны аах Тыа хаһаайыстыбата

Нерюнгри дьаһалтата фермер тыраахтар атыылаһарыгар көмөлөстө

Нерюнгри оройуонун баһылыга Роман Щегельняк, дьокутааттар оройуоннааҕы сэбиэттэрин бэрэссэдээтэлин солбуйааччы Анатолий Шевченко Гаридовтар бааһынай хаһаайыстыбаларыгар саҥа тыраахтар күлүүһүн туттардылар.

Гаридов салайар «Северное сияние» бааһынай хаһаайыстыбата ынах сүөһүнү, көтөрү иитэн, оҕуруот аһын олордон, чохтоох куорат олохтоохторун сибиэһэй этинэн-үүтүнэн уонна оҕуруот аһынан хааччыйар. Ону сыаналаан, оройуон дьаһалтата «2017-2021 сс. Нерюнгри оройуонугар агропромышленнай комплексы сайыннарыы» бырагыраама чэрчитинэн, тиэхиньикэ атыылаһыытыгар үп көрбүтэ. Ол харчыга тирэҕирэн, фермер бэйэтиттэн эбии харчы уган, саҥа «МТЗ» тыраахтары атыыласта.

Саҥа тыраахтар уруула гидроусилителлээх буолан, тырахтарыыс кэбиинэттэн тахсыбакка олорон, насадканы устар да, уларытар да кыахтаах. Эбии тэрил быһыытынан отвал, вила, ковш ылыммыт. Даҕатан эттэххэ, «2017-2021 сс. Нерюнгри оройуонугар агропромышленнай комплексы сайыннарыы» муниципальнай бырагыраама чэрчитинэн, табаһыттарга, булчуттарга, килиэккэлээх кыылы иитээр хаһаайыстыбаҕа уонна аҕа ууһун общиналарыгар көмө утумнаахтык оҥоһуллар. Холобур, ааспыт сылга Иенгратааҕы кыылы иитэр пиэрмэҕэ субсидия бэриллибитэ.

Раиса Сибирякова, «Саха сирэ», edersaas.ru

0
0