Бэҕэһээҥҥиттэн Нерюнгри куоракка Саха сирин суруйааччыларын сойууһун ыҥырыытынан Арассыыйа биир улахан хаһыатын “Литературнай хаһыат” десана саҕаланна.
“Литературнай хаһыат” Саха сирин кытары туох сибээстээҕий диэтэххэ, хаһыат биһиги өрөспүүбүлүкэбитин кытары уруккуттан бииргэ үлэлиир. Хаһыакка саха литературатыгар анаммыт балаһалар тиһигин быспакка тахса тураллар. Бу соторутааҕыта Саха сирин нууччалыы тыллаах поэттарын хоһооннорун хомуурунньуга тахсыбыта. Ону сэргэ бэчээттэнэн тахсыбыт кинигэлэри билсиһиннэрэллэр. Манна даҕатан эттэххэ, 2016 с. норуодунай поэт Наталья Харлампьева саха уонна нуучча литератураларын доҕордоһууларын, сибээстэрин туһунан кинигэ суруйан, “Литетатурнай хаһыат” төрүттээбит бириэмийэтинэн бэлиэтэммитэ.
“Литературнай хаһыаттан” эрэдээктэринэн өр сылларга үлэлээбит, прозаик, драматург, сценарист, уопсастыбаннай деятель Юрий Поляков уонна хаһыат литературнай сэбиэтин чилиэнэ, прозаик, филологическай наука кандидата Владимир Еременко кэллилэр. Юрий Поляков 16 сыл устата Арассыыйа литературнай сүрүн хаһыатын салайан кэллэ. Кини РФ бэрэсидьиэнэ Владимир Путин итэҕэллээх киһитинэн үс төгүл анаммыта. Ону сэргэ кини РФ бэрэсидьиэнин култуураҕа, искусствоҕа сэбиэтин чилиэнэ буолар. Билигин кини “Литературнай хаһыат” редакционнай сэбиэтин бэрэссэдээтэлинэн үлэлиир. Оттон Владимир Еременко Саха сирин суруйааччыларын кытары уруккуттан билсэр. Биһиги өрөспүүбүлүкэбитигэр бу төрдүс сырыыта. Саха сирин туһунан элбэхтэ суруйан, кэпсээн турар.
Суруйааччылар Нерюнгрига балаҕан ыйын 2 күнүгэр диэри үлэлиэхтэрэ. Кинилэри кытары Саха сирин биллиилээх прозаига, драматура Василий Васильев – Харысхал сылдьар. Суруйааччылар библиотекаларга, оскуолаларга ыалдьыттыахтара, ону сэргэ тэрилтэлэр кэллэктииптэрин кытары көрсүөхтэрэ.
Санатан эттэххэ, Ил Дархан э.т. Айсен Николаев бу соторутааҕыта култуураҕа туһуламмыт дискуссионнай былаһааккаҕа суруйааччылар этиилэрин истэн баран, айар сойуустары хайаатар да өйүөххэ наадатын, суруйааччылар, артыыстар, худуоһунньуктар, о.д.а. айар идэлээх дьон норуот духуобунай сайдыытын байыталларын бэлиэтээн турар. Онуоха бу маннык десаннар, ааҕааччылары кытары көрсүһүүлэр төһүү күүс буолаллар.
Аграфена КУЗЬМИНА, “Саха сирэ” хаһыат, edersaas.ru