Инбэлииттэр декадаларын чэрчитинэн, Нерюнгри куоракка баар “СУВАГ” кииҥҥэ эмтэнэ сытар оҕолор дьоҕурдарын арыйар тэрээһиннэр ыытылыннылар. edersaas.ru
Манна эмтэнэ сытар оҕолор уонна кинилэр төрөппүттэрин оҥоһуктарын быыстапката элбэх дьону сөхтөрдө. Бу тэрээһиҥҥэ Нерюнгри куораттааҕы Оҕо айымньытын сайыннарар киин уонна Оҕо бибилэтиэкэтин үлэһиттэрэ кэлэн, тиэстэттэн, оҕуруоттан, түүттэн оонньуурдары оҥорорго маастар-кылаастары ыыттылар.
Оттон киин үлэһиттэрэ Серебряный Бор бөһүөлэккэ олорор инбэлиит оҕолору көрдүлэр-иһиттилэр, мөлтөхтүк истэр кырачааннарга көмөлөстүлэр.
Биллэн турар, инбэлиит оҕолордоох төрөппүттэр араас элбэх кыһалҕаны көрсөллөр. Кинилэри долгутар ыйытыыларыгар толору хоруй ылалларын курдук, “төгүрүк остуол” ыытылынна. Манна Биэнсийэ фондатын, Социальнай страховкалааһын фондатын, социальнай көмүскэл управлениетын үлэһиттэрэ кэлэн кытыннылар. Төрөппүттэр “СУВАГ” үлэтин үчүгэйинэн сыаналаатылар.
Декада түмүгэр “Миигин тэҥнээҕиҥ курдук көр” диэн бэстибээл, “Көрдөөх стартар” спортивнай күрэхтэһии ыытылыннылар. Бэстибээлгэ доруобуйаларыгар хааччахтаах оҕолор талааннарын арыйан, элбэх ырыаны, үҥкүүнү бэлэхтээтилэр. Оттон оҕолорго барыларыгар минньигэс бэлэхтэри туттаран үөртүлэр. Куукула тыйаатырын артыыстара “Курочка Ряба” диэн испэктээкили босхо көрдөрдүлэр.
Бу маннык тэрээһиннэр доруобуйаларыгар хааччахтаах оҕолого улахан бырааһынньык кэриэтэ буолаллар, бэйэлэрин күүстэригэр эрэллэрэ күүһүрэригэр, кыахтарын арыйалларыгар көмөлөһөр.
Ангелина Васильева, “Саха сирэ” хаһыат, edersaas.ru