Нерюнгри атыы-эргиэн кииннэрэ санитарнай-эпидемиологическай ирдэбиллэри тутуһаллар

Саха Өрөспүүбүлүкэтин Ил Дархана Айсен Николаев Нерюнгри улууһун баһылыга Виктор Станиславскайы кытта Нерюнгри улахан атыы-эргиэн киинигэр сылдьан, санитарнай-эпидемиологическай ирдэбиллэри төһө тутуһалларын бэрэбиэркэлээтэ.

edersaas.ru

Атыы-тутуу павильоннарын, саалаларын кэрийдилэр, атыыһыттар мааскалаах уонна антисептигы туттан үлэлииллэрин көрдүлэр.

Атыы-эргиэн киинигэр бары атыыһыттар мааска, бэрчээккэ кэтэн үлэлииллэр. Оттон тус харыстанар сириэстибэлэри туттубатах дьон маҕаһыынтан атыылаһар бырааптара суох. Бу туһунан маҕаһыыҥҥа киирээти кытта сэрэтиллэр.

Нерюнгри улууһун баһылыга Виктор Станиславскай этэринэн, атыыһыттары уонна урбаанньыттары кытта коронавирус тарҕамматын туһугар сэрэтэр үлэ өрүү оҥоһуллар, оройуон административнай хамыыһыйата хонтуруоллуур үлэни тиһигин быспакка ыытар.

Ирина Ханды, “Саха сирэ” хаһыат, edersaas.ru

Хаартыска: СӨ Ил Дарханын уонна Бырабыыталыстыбатын пресс-сулууспата