Маны аах Уопсастыба

Үүнэр сылга Намҥа Култуура уонна духуобунай сайдыы дыбарыаһа үлэҕэ киириэ

Саха АССР 100 сылыгар Намҥа култуура уонна духуобунай сайдыы дыбарыаһа үлэҕэ киириэ.

Нам улууһугар нэһилиэнньэни кытары көрсүһүү түмүгүнэн, СӨ Ил Дархана Айсен Николаев сорудаҕынан, Намҥа култуура уонна духуобунай сайдыы киинэ үлэҕэ киириэҕэ. Улахан эбийиэк Үүнэр көлүөнэ тус сыаллаах пуондатынан «АЛРОСА» АХ (ПАУо) үбүн-харчытын суотугар тутуллар. Баараҕай дыбарыаһы үүнэр сылга, Максим Аммосов төрөөбүтэ 125 уонна Саха АССР 100 сылларыгар үлэҕэ киллэрэри былаанныыллар. Бу туһунан СӨ Үүнэр көлүөнэ тус сыаллаах пуондатын пресс-сулууспата иһитиннэрэр.
Үс мэндиэмэннээх биэс тыһыынча кв.м. тахса иэннээх алаһа оройуон бүттүүнүн култуурунай олоҕун эргийэр киининэн буолуоҕа. Этэллэринэн, манна кыраайы үөрэтэр түмэл, ЗАГС салаата, хартыына галереята, бибилэтиэкэ, 400 миэстэлээх көрөөччүлэр олорор саалалара былааннаналлар.
«Музей дьиэтэ 1972 сыллаахха тутуллубута. Онон билигин оройуон бары олохтоохторо, кыраайы үөрэтээччилэр саҥа дьиэҕэ түмэл аһылларын тулуйбакка-тэһийбэккэ күүтэбит. Бырайыакка бэйэбит көрүүбүтүн, түмэл ханан баар буолуохтааҕын, барылын оҥорбуппут. Бу күүтүүлээх, үөрүүлээх түгэммит үүнүө диэн эрэнэбит. Аныгы үйэҕэ биһиги түмэлбит адьас ураты буолуоҕа, сайдыы саҥа түһүмэҕэ саҕаланыа«, — диир П.И.Сивцев аатынан история-этнография Намнааҕы түмэлин дириэктэрэ Александр Копырин.
«Манна биир сүрүн уратынан, сүрүн тэрилтэлэр биир сиргэ түмүллүбүттэрэ буолуоҕа. Барыта саҥа, сонун дьон сүргэтин көтөҕүө«, — диэн СӨ Үүнэр көлүөнэтин тус сыаллаах пуондатыттан Алексей Ефремов этэр.
Тутуу билиҥҥи туругунан 45% бэлэм. Бэдэрээттээх тэрилтэ бэрэстэбиитэлэ, «РФА-Инвест» ИФК АУо генеральнай дириэктэрэ Семен Софронов иһирдьэ истиэнэлэр быысаһыыларын, о.д.а. оҥоро сылдьалларын сырдатта. «Үлэ кэлэр сылга олунньуттан саҕаланыа. Ититиини киллэриитин, уунан-хаарынан хааччыллыытын оҥоруу, о.д.а.элбэх«, — диир кини.
Нам улууһун баһылыга Юрий Слепцов дыбарыаһы эргиччи туох барыта дьоҥҥо-сэргэҕэ табыгастаах буоларын курдук тэриллиэҕин, оҥоһуллуоҕун бэлиэтиир. «Дыбарыас таһыгар бэйиэт, тылбаасчыт Илья Винокуров-Чаҕылҕан түмэлэ,  Максим Аммосов болуоссата баар буолуохтара. Олохтоохтор бу улахан тутуу үлэҕэ киирэрин долгуйа күүтэллэр. Бу бырайыак өрөспүүбүлүкэ, улуус салалталарын, пуонда, «АЛРОСА» хамаанданан улахан үлэлэрэ«, — диэн баһылык махталын биллэрэр.
0
0
Telegram @edersaas20