![](https://edersaas.ru/wp-content/uploads/2021/09/WhatsApp-Image-2021-09-13-at-16.57.00.jpeg)
Саха сирин тэбэр сүрэҕэ – Дьокуускай куораппыт күннэтэ сайдар, киэркэйэр. Киин куорат тэриллибитэ 400 сылын көрсө элбэх үлэ былааннанар. Аны уонча сылынан куораппыт киһи билбэт буола уларыйыаҕа, тупсуоҕа. Биир оннук бастыҥ бырайыагынан “Үүнэр көлүөнэлэр пааркалара” буолар.
Балаҕан ыйын 13 күнүгэр Үүнэр көлүөнэлэр тус сыаллаах пуондаларын дириэктэрэ Владимир Егоров уонна “Дирекция по строительству” инвестиционнай-тутар тэрилтэ дириэктэрэ Владимир Никитин илии баттастылар. Тэрээһиҥҥэ бырабыыталыстыба бэрэссэдээтэлин солбуйааччы Сергей Местников, өрөспүүбүлүкэ кылаабыйна архитектора Ирина Алексеева, Дьокуускай кылаабынай архитектора Семен Сергеев кытыннылар. Москваттан “Атирум” архитектурнай мастарыскыай кылаабынай архитектора Антон Надточий интэриниэтинэн быһа сибээскэ таҕыста.
Бу сөбүлэһии түмүгүнэн, Дьокуускайга 2025 сылга баараҕай “Үүнэр көлүөнэлэр пааркалара” тутуллара былааннанар.
Паарка университеттан чугас, Петровскай-Каландаришвили уулуссалар быһа охсуһууларыгар баар 2,4 гектар иэннээх аһаҕас сиргэ тутуллуохтаах. Баараҕай бырайыак Ил Дархан Айсен Николаев сорудаҕынан оҥоһуллар. 2019 сыллаахха Арассыыйа үрдүнэн бырайыактааһыҥҥа аһаҕас куонкурус биллэриллибитэ. Манна Москваттан “ATRIUM/Восток+” тэрилтэ кыайбыта. Паарка бырайыага архитектураҕа, бырайыактааһыҥҥа,тутууга араас бириэмийэлэри ылбытын бэлиэтиир тоҕоостоох.
Бу – оҕолору, ыччаты үөрэтэр, сайыннарар кластер буолуоҕа. Тас өттө эмиэ олус интэриэһинэй, билиҥҥитэ Дьокуускайга суох көстүүлээх буолуоҕа. Манна скейт-былаһаакка, атриум, оонньуур, чэбдигирэр сирдэр, о.д.а. баар буолуохтара.
Баараҕай тутууну үбүлээһин өрөспүүбүлүкэ бүддьүөтүттэн барбат, “АЛРОСА” социальнай эбийиэктэри үбүлүүр бырагырааматын чэрчитинэн тутуллуоҕа.
Ангелина Васильева, «Саха сирэ» хаһыат, edersaas.ru
Хаартыска: