Үүнэр көлүөнэ тыйаатырын испэктээгэ норуоттар икки ардыларынааҕы бэстибээлгэ кыттыаҕа
Муус устар 2-5 күннэригэр «Он. Она. Они» диэн норуоттар икки ардыларынааҕы моно уонна камернай испэктээктэр бэстибээллэрэ ыытыллыаҕа. Манна Саха сирин Үүнэр көлүөнэтин тыйаатыра Нина Мазур пьесатынан «Это Я — Эдит Пиаф» испэктээги көрдөрүөҕэ. Испэктээги СӨ искусствотын үтүөлээх диэйэтэлэ Александр Титигиров туруорда. Сүрүн оруолу М.С.Щепкин аатын театральнай училище выпускницата, СӨ култууратын туйгуна Изабелла Егорова толорор.
«Он. Она. Они» бэстибээли Екатеринбурдааҕы судаарыстыбаннай театральнай институт айар сибээһи сайыннарар, уопут атастаһар, тыйаатыр эйгэтигэр саҥа сонун хайысхалары тобулар сыаллаах тэрийэр. Москва, Санкт-Петербург, Казань, Саха сирэ, Словения, Германия, Румыния, Турция, Аргентина уо.д.а. театральнай кэлэктииптэр туруорууларын эспиэрдэр сыаналыахтара.
Тас дойдулар испэктээкиллэрин онлайн киэбинэн көрдөрүөхтэрэ, оттон биһиги тыйаатырбыт «Это я — Эдит Пиаф» моно-испэктээгин муус устар 4 күнүгэр Екатеринбург театральнай институтун сыанатыгар туруоруҕа.
Үүнэр көлүөнэ тыйаатырын пресс-киинэ.
Хаартыска — пресс-киинтэн.