ИТ паарка “Точка кипения” ситимигэр оҕолорго уонна ыччакка аналлаах «Skills Park» үөрэх куурустарын аһыллыыта буолла. Бырайыак Үүнэр көлүөнэ пааркатын үөрэххэ бырагырааматын иитинэн олоххо киирэр.
Өскөтүн бу иннинэ Саха сирин үөрэнээччилэригэр урбаан, медиа уонна кулинария куурустара ыытыллыбыт эбит буоллахтарына, билигин лидер, уратытык толкуйдуур, коммуникативнай сатабылларга үөрэтэр, эмоциональнай интеллеги сайыннарар, тайм-менеджмент, дьон иннигэр саҥара үөрэниигэ уонна бэйэ миэстэтин булууга аналлаах буолла.
“Паарка үлэҕэ киириэр диэри аныгы оҕо тугу сэҥээрэрин, ирдэнэрин өйдүүр туһугар үлэлиибит. Билигин биһиги үөрэхпит куурустарыгар көхтөөхтүк кыттааччылар – биһиги сүрүн аудиториябыт буолар. Кинилэр интэриэстэрин үөрэтиэхпит, учуоттуохпут уонна паарка олоххо киирэригэр үлэтин онно туһаайыахпыт”, — диэн СӨ Тус сыаллаах үүнэр көлүөнэ пуонда генеральнай дириэктэрэ Владимир Егоров эттэ.
Тэйиччиттэн уонна олоҕурбут көрүҥүнэн барар үөрэххэ 150-тан тахса оҕо сылдьар. Үүнэр көлүөнэ пуондата куурустары «Deti MBA» норуоттар икки ардыларынааҕы биисинэс-оскуоланы уонна «Supreme School» сатабыллары сайыннарар оскуоланы кытта ыытар.
“Оҕолор «блэнд-форматынан» — видео уруоктарга үөрэнэллэр, күннээҕи сорудахтары толороллор уонна иҥэриммит билиилэрин быраактыканан – трениннэринэн, оонньууларынан бигэргэтэллэр. Манна үрдүк квалификациялаах исписэлиистэр: оҕону кытта үлэҕэ элбэх сыл уопуттаах тренердэр, педагогтар уонна психологтар сыһыарыллыбыттара”, — диэн «Supreme School» салайааччыта Айталина Федорова кэпсиир.
Бэлиэтээн эттэххэ, Үүнэр көлүөнэ паарката Дьокуускай куоракка 2025 сылга тутуллуо. Бу сылы эргиччи үлэлиир уопсастыбаннай, туһалаах, аралдьытар уонна сынньатар эйгэнэн буолуо. Бырайыак үүнэр көлүөнэ айар дьоҕурун, киэҥ билиитин-көрүүтүн, дуохуобунай уонна эт-хаан өттүнэн сайдыытын хааччыйар эко систиэмэтин тэрийиигэ туһаайыллар.
СӨ Тус сыаллаах үүнэр көлүөнэ пуондатын пресс-сулууспата.