Дьокуускайга «Точка кипения» толкуйу, бырайыагы өйүүр, сайыннарар ситимҥэ СӨ Үүнэр көлүөнэ пааркатын боппуруоһун дьүүллэстилэр.
Кэпсэтиигэ, санааны атастаһыыга СӨ Үүнэр көлүөнэтин тус сыаллаах пуондата уонна Cube.Moscow киини төрүттээбит, Tag Yakutia бырайыак хамаандата, салайааччы арт-менеджер, Саха сириттэн төрүттээх Надежда Зиновская кыттыыны ыллылар.
Үүнэр көлүөнэҕэ ананар паарка 2022 сылга, САССР 100 сылыгар, куорат киинигэр тутуллара былааннанар диэн СӨ Үүнэр көлүөнэ тус сыаллаах пуондатын пресс-сулууспата иһитиннэрэр.
Бэлиэтээн эттэххэ, араас сонунтан-сонун өрүттээх, оҕолор, ыччаттар дьоҕурдарын, сатабылларын, үөрүйэхтэрин сайыннаралларыгар, билиилэрин-көрүүлэрин хаҥаталларыгар туһуланар өрөспүүбүлүкэ бырайыага СӨ Ил Дархана Айсен Николаев сорудаҕынан олоххо киллэриллэр. 2019 сыллаахха ыытыллыбыт архитектурнай торуму уонна эбийиэк сирин-уотун генеральнай былаанын оҥорууга Бүтүн Арассыыйатааҕы аһаҕас күрэс түмүгүнэн, «ATRIUM/Восток+» консорциум кыайыылааҕынан тахсыбыта. Эбийиэги олоххо киллэриини сүрүннээччинэн (координаторынан) СӨ Үүнэр көлүөнэтин тус сыаллаах пуондата буолбута.
«Паарка ХИФУ кампуһун таһыгар тэриллиэ. Бырайыак кэнчээри ыччаты сайыннарарга туһуланар. Былырыын Үөрэх уонна наука министиэристибэтин, Саха сирин сайыннарыы корпорациятын уонна федеральнай эспиэрдэри кытары бииргэ «Skills Сamp» үөрэтэр бырагыраама ыытыллыбыта. Педагогическай хамаандалар ытыллыбыт бырагыраама чэрчитинэн, аныгы креативнай экэниэмикэ ирдэбилигэр олоҕуран, оҕолор сатабылларын, үөрүйэхтэрин сайыннарарга туһуламмыт бырайыактарынан үлэлээбиттэрэ. Араас эйгэ бэрэстэбиитэллэрин, партнердары, потенциальнай резиденнэри кытары көрсүһүүлэр, санаа атастаһыылара, дьүүллэһиилэр тиһиктээхтик салҕаналлар. Биһиги сыалбыт — бары сыраны, күүһү түмэн, холбоон, табыгастаах, сөптөөх ньыманы тобулуу, кэскиллээх бырайыактары оҥорон таһаарыы. Кэнчээри ыччат дэгиттэр сайдыытынан аан дойду таһымыгар тахсар кыахтанарыгар бары болҕомто туһаайыллар«, — диэтэ пуонда генеральнай дириэктэрэ Владимир Егоров.
Үөрэтэр бырагыраамаҕа улахан болҕомто уурулунна, кэпсэтии ыытылынна. Улахан бырайыагы олоххо киллэрии иитинэн, хардарыта сибээстээх үлэлээһини ырыттылар. «Ыччаты сайыннарар баҕа санаа барыбытын түмэр. Мин көрөрбүнэн, бырайыак инникигэ дохсун хардыыны оҥорорго сөптөөх түһүмэххэ кэлбит. Бырагыраама саамай тоҕоостоох кэмигэр, бириэмэтигэр үөскүүр. Аны уон сылынан, үрдүк таһымнаах бастакы түмүктэри көрүөхпүтүн сөп«, — диэтэ Надежда Зиновская.