Уопсастыба Успуорт

Ненад  Лалович: “Ыалдьааччыларга махтанабын”



Көҥүл тустууга аан дойду Кубогын тэрээһинин уонна күрэхтэһиини Ненад Лалович үрдүктүк сыаналаата:

Кубок Саха сиригэр Айсен Николаев уонна Михаил Мамиашвили үтүө өҥөлөрүнэн ыытылынна. Күрэхтэһии буолар сиринэн Дьокуускайы талбыппыт саамай сөптөөх быһаарыныы эбит. Кэлбит дойдулар бэрэстэ­биитэллэрэ тэрээһинтэн астыммыттарын биллэрбиттэрэ. UWW (United World Wrestling – тустуу аан дойдутааҕы түмсүүтэ) регламенын ирдэбиллэрэ кэһиллибэтилэр. Аны Саха сирин Ил Дарханыттан саҕалаан күрэхтэһиигэ кэлбит хас биирдии ыалдьааччыга тиийэ бары ыалдьытымсахтарыттан сөхтүм. Онон Саха Өрөспүүбүлүкэтин олохтоохторугар тустуу үгэстэрин убаастыыргыт иһин махталбын тиэрдэбин.

Уопсайынан, UWW улахан күрэхтэһиилэри киин куораттарга эрэ буолбакка, эрэгийиэннэргэ ыытыллалларын эмиэ учуоттуур. Ол курдук, Каспийскайга да, Пермьҥа да, Дьокуускайга да буолбут күрэхтэһиилэр үрдүк таһымнаахтык аастылар диэн бэлиэ­тиибин.  Росконгресс пуонда тэрийээччилэргэ олус көмөлөстө. Бу пуонда аан дойду таһымнаах форумнары, бэстибээллэри бэркэ ыытар уопуттаах.

Кубок арыллыытын үөрүүлээх чааһын сэргээтим, кылгас кэм иһигэр Саха сирин устуоруйатын, култууратын көрдөрдүлэр. Оттон күрэхтэһии саамай дьиҥнээх атмосфератын тоҕо анньан кэлбит толору саала – ыалдьааччылар олохтоотулар диэтэхпинэ сыыспатым буолуо. Кинилэр саха тустууктарын, Арассыыйа сүүмэрдэммит хамаандатын эрэ иһин буолбакка, атын дойдулары эмиэ ыһыы­таан-хаһыытаан, уруйдаан-айхаллаан көрсүбүттэрэ бэртээхэй түгэн этэ, онон тустуу сүгүрүйээччилэригэр, ыалдьааччыларыгар махтанабын. Хас биирдии хапсыһыы олус тыҥааһыннаахтык уонна дьоһуннук буолла, бары хамаандалар кэлэр Олимпиадаҕа күүстээх үлэни ыыта сылдьаллара тута көстөр.

Айтана Аммосова, edersaas.ru

 

0
0

Санааҕын суруй