Гороскоп

Нэдиэлэтээҕи гороскоп (атырдьах ыйын 26 — балаҕан ыйын 2 күннэрэ)

Хой

Көргө-күүлэйгэ уонна ымсыырбыккын атыылаһаргар үп-харчы бөҕөҕүн барыах курдуккун. Көччүйэртэн сылайдаххына, дьэ дьыалаҥ-куолуҥ мөлтөөрү гыммытын билэн соһуйуоҥ. Ол эрээри түргэнник хамсаннаххына, дьыалаҕын-куолугун орун-оннугар түһэриэҥ, өссө ситиһии тосхойуон сөп.

Оҕус

Дуоһунаска, чыыҥҥа-хааҥҥа тардыһыаххын сөп. Ол эйигин үлэҕэ көҕүлүөҕэ. Маныаха ситиһии кэлиитин 30 бырыһыана табыллыыттан тутулуктаныаҕа, оттон 70 бырыһыана – дьулуургуттан.

Игирэлэр

Тугу торумнаабыккын бу нэдиэлэҕэ ситиһэриҥ уустуктардаах, ол эрээри санааҕын түһэримэ. Билигин сиппэтэххин кэлэр нэдиэлэҕэ ситиһиэххин сөп. Төттөрүтүн арыый да тохтуу, уоскуйа түһэн, сиһилии толкуйдаа.

Араак

Нэдиэлэ бастакы аҥаарыгар ханнык баҕарар балаһыанньаны этэҥҥэ туо­руоҥ. Тугунан да дьарыктаммытыҥ иһин, төһө барыһы ылыахтааҕыҥ эйигин хамсатар күүһүнэн буолуоҕа. Онон тыын боппуруостаргын аа-дьуо быһаарыаҥ.

Хахай

Доҕотторгун уонна таптыыр киһигин кытары олус эйэҕэс буолуоҥ.Ол эрээри, ким эмэ эн олоххор ороостоҕуна, сорунуулаахтык утарсыаҥ.  Былааныҥ туолумаары гыннаҕына даҕаны олус омуннаммакка, холкутук сыһыаннас.

Кыыс

Үөскээбит быһыы-майгы кыһалҕаларгын суһаллык быһаараргар уонна былааҥ­ҥыттан атыннык дьаһанаргар күһэйиэҕэ. Дьону кытта аһаҕас иирсээҥҥэ киириэҥ суоҕа. Тапталга сыһыаннаан эттэххэ, бу кэмҥэ таптыыр курдук туттунуоҕуҥ.

Ыйааһын

Тапталга өйгүн сүтэриэҥ суоҕа. Ол эрээри мындыр өйгүнэн тапталлаах киһигин бэйэҕэр тардыаҥ. Өрөбүллэргэ астына-дуоһуйа сынньан. Чуҥкуйбат буола сатаа.

Скорпион

Тулуурдаах буоллаххына, саамай устук балаһыанньалартан тахсыаҥ, онон олоҕуҥ тосту уларыйыа. Үп-харчы аахсарга уонна дьоһун дуоһунастанарга болҕомтоҕун уур – барыта табыллыаҕа. Өстөөхтөргүн кыайдаххына, санааҥ өссө күүһүрүөҕэ. Эн ситиһиигэр ымсыырыахтара.

Охчут

Бу нэдиэлэҕэ бэйэҕин үчүгэй оҥорор туһугар кыһаныаҥ. Бэйэҕин уларытан, итэҕэстэргин туораттаххына, олоххун кытта уларытыаҥ. Тус сайдыыҥ туһугар, бэл, психологка сылдьыаххын сөп. Кини эйиэхэ көмөлөһүөҕэ.

Чубуку

Үлэҕэр, дьиэ кэргэҥҥэр уонна тус олоххор сөптөөх быһаарыныылары ылынар нэдиэлэҥ. Онно сүрэҕиҥ тугу ыйарын иһит, барытын толкуйдаан оҥор.

Күрүлгэн

Таптал өттүгэр уустук кэм. Таптыыр киһиҥ эн баҕа санааҕар сөп түбэспэт буоллаҕына, арахсыаххын да сөп. Ол эрээри аҥаар кырыытыттан үрэйэ сатаа­ма, тохтоон толкуйдаа.

Балыктар

Бу нэдиэлэ саамай холку уонна үтүө тосхоллоох кэминэн буолуоҕа. Бэйэҥ олоххуттан астынан, дьоллоохтук сананыаҥ. Нэдиэлэ бүтүүтэ айар талааныҥ арыллыаҕа. Онно болҕой.

 

0
0