Нэдиэлэ иһигэр Арассыыйа 46 эрэгийиэнигэр 578 ойуур баһаара умулларыллыбыт

Ааптар: 
Бөлөххө киир:

От ыйын 11-17 күннэригэр ойуур баһаарын утары охсуһааччылар уонна уоту утары охсуһууга кыттыбыт дьон Арассыыйа 46 эрэгийиэнигэр 578 ойуур баһаарын умуллардылар. 

Биир нэдиэлэ иһигэр ойуур баһаарын утары охсуһар сулууспа уонна уоту умулларыыга үлэлэһээччилэр уопсайа 15 тыһ.гектартан тахса (15 556,23 га) иэннээх сиргэ 578 ойуур баһаарын умулларбыттар.

Нэдиэлэ иһигэр Коми Өрөспүүбүлүкэтигэр, Ханты-Мансийскай (ЮГРА), Ямал-Ненецкэй АУо, Архангельскай, Томскай уобаластарга, Красноярскай, Пермь кыраайдарыгар, Бурятияҕа, Саха Өрөспүүбүлүкэтигэр, Свердловскай уобаласка элбэх баһаардар умулларыллыбыттар.

Бүгүн Арассыыйа 14 эрэгийиэнигэр, уопсайа 23 748,58 га иэннээх сиргэ, ойуур баһаардарын умуллараллар.

Хабаровскай кыраайга — 13 ойуур баһаарын (уопсай иэнэ 7 351 га) умуруораллар, итинтэн 1 740 га иэннээх сиргэ улахан баһаар бохсуллубут.

Саха сиригэр — 24 ойуур баһаарын (6 282 га), итинтэн биэс ойуур баһаара (1 394 га) бохсуллубут;

Коми Өрөспүүбүлүкэтигэр — 34 ойуур баһаарын (1 536 га), итинтэн 18 (1237 га) бохсуллубут.

Бу өрөбүллэргэ Коми Өрөспүүбүлүкэтигэр Авиалесоохрана федеральнай саппааһын кытыннарыынан, эрэгийиэҥҥэ 46 ойуур баһаарын (3 264 га) умуруорбуттар.

Саха сиригэр бу өрөбүллэргэ 6 ойуур баһаарын (3 043 га) умуруорбуттар.

Ойуур баһаарын умуруорууну тыал уонна кураан күн-дьыл уустугурдар.

Хабаровскай кыраайга өрөбүл күннэргэ Федеральнай Авиалесоохрана зондировщик-сөмөлүөтэ ардаҕы ыҥырыыга үлэлээтэ. Салгын аала «Веер» диэн анал туруоруллубут тэриллээх. Анаан ардаҕы ыҥыран түһэрии уот тарҕаныытын тэтимин бытаардан, кыраайга алта ойуурга баһаар кутталын (Охотскайдааҕы уонна Аяннааҕы лесничество) намтатта.

Зондировщик үлэтэ парашютист-десантниктарга уот кытыытыгар кэлэн умулларалларыгар кыаҕы биэрэр. Авиабаһаарынайдар 20 лиитэрэлээх уоту умуруорар тэрили сүгэ сылдьан үлэлииллэр. Баһаардар буола турар сирдэригэр уу-хаар чугас суох буоллаҕына, парашютист-десантниктар, арыт, 5 км сири тайҕа уустук суоллаах-иистээх сиринэн сатыы бараллар.

Ойуур баһаарын умулларыыга парашютист-десантниктар элбэх сыраны көрсөллөр, тоҕо диэтэххэ, баһаардар сүрүннээн уустук суоллаах-иистээх уонна ыраах сирдэргэ бааллар. Маннык баһаардарга сиринэн айанныыр тиэхиньикэ хааччахтаах буолар эбэтэр кыайан тиийбэт. Ол иһин Авиалесоохрана хамаандатын сүрүннээн бөртөлүөтүнэн илдьэллэр.

Ми-8 бөртөлүөт түһэр сирэ суох буоллаҕына, десантниктар халыҥ ойуурга анал быанан түһэллэр.

Ойуур баһаардарын хат күөдьүйэр биричиинэлэрэ — этиҥнээх ардах уонна антропогеннай биричиинэ: ойуур баһаарын 85 % — этиҥнээх ардах, 11 % — нэһилиэнньэ буруйунан, 2 % атын көрүҥтэн.

Бүгүн эрэгийиэннэргэ  Авиалесоохрана 800 үлэһитэ  ойуур баһаардарын умуруорууга көмөлөһөр.

Ыксаллаах быһыы-майгы эрэсиимэ РФ алта субъегар киллэриллибит: Коми Өрөспүүбүлүкэтин бары сиригэр-уотугар, Хабаровскай кыраайга, Иркутскай уобаласка Катангскайдааҕы МТ, Магадан уобалаһыгар Ягоднинскай МТ, Сахалинскай уобалас Охинскайдааҕы МТ.

Ойуур баһаарын утары уһулуччу эрэһиим Арассыыйа 60 эрэгийиэнигэр киллэриллэн турар.

Видеолары https://disk.yandex.ru/d/uiKz2qMuiAEKqg киирэн көрүөххүтүн сөп.

Оксана Мирисёва,

«Авиалесоохрана» ФБУ уопсастыбаннаһы кытары сибээскэ отделын начаалынньыгын солбуйааччы

Хаартыска интэриниэт ситимиттэн

+1
0
+1
0
+1
0
+1
0
+1
0
+1
0
+1
0