Дьокуускайга А.Е.Кулаковскай аатынан норуоттар доҕордоһууларын дьиэтэ тэрийбит «Арт атриум» былаһааккатыгар куорат олохтоохторо, ыалдьыттар үөрэ-көтө түмсэр үгэстэннилэр.
Манна бэртээхэй ырыаны-тойугу истэллэр, астына-дуоһуйа үҥкүүлүүллэр, араас ыйытыктарга хоруйдаан өссө бириистэри туталлар, быыстапка бэртээхэйигэр ыалдьыттыыллар. Бу туһунан норуоттар доҕордоһууларын дьиэтин пресс-сулууспата иһитиннэрэр. Быйыл олунньуга «Мне дано» диэн ырыаларын бастакы альбомун таһаарбыт, болҕомтону тардыбыт «Macintosh», «Музыканнар дьиэлэриттэн» куорсун анньыммыт «051» бөлөх, дууһа кылын таарыйар ураты музыкалардаах «Тыас-уус», 2007 сыллаахха биир кылааска үөрэммит уолаттар тэрийбит уонна көрөөччү тапталын ылбыт, өрөспүүбүлүкэтээҕи бэстибээллэр, куонкурустар («Этигэн хомус», «Саҥа ырыа», «Үрдэл», о.д.а.) хас да төгүллээх кыайыылаахтара, номинаннара «Happy chuck», 2005 сыллаахха тэриллибит, рок музыкаҕа «Бүтэһик пионер» диэн ырыатынан болҕомтону тардыбыт, Дьокуускай-Хатас маршрут нүөмэринэн ааттаммыт «103» бөлөхтөр ырыаны-тойугу көҕүлүттэн туттулар, хас биирдии нүөмэр дохсун ытыс тыаһынан доҕуһуолланна.
Санатан эттэххэ, А.Е.Кулаковскай аатынан норуоттар доҕордоһууларын дьиэтэ дьон-сэргэ астына, дуоһуйа сынньанарыгар анаан «Арт атриум» былаһаакканы тэрийбитэ. Хас чэппиэр, бээтинсэ ахсын К.Маркс таһыгар быыстапка-даарбаҥка, сэргэхситэр бырагыраама арааһа, маастар-кылаастар, бука барыларыгар үҥкүү-битии, о.д.а. көхтөөхтүк ыытыллар.
От ыйын 28 күнүгэр 17:00 чаастан «20-с үйэ тапталлаах ырыалара» ретро-биэчэр, от ыйын 29 күнүгэр 12:00-19:00 ч. диэри норуоттар икки ардыларынааҕы доҕордоһуу күнүгэр тэрээһин бэртээхэйэ былааннанарын иһитиннэрэллэр.