Дойду бырабыыталыстыбата кэнники сылларга нэһилиэнньэни өйүүргэ хаһааҥҥытааҕар да элбэх дьаһалы ылар. Ол иһигэр, дьиэ кэргэн уонна оҕо аймах харыстабыла, доруобуйа харыстабылын уонна үөрэхтээһин систиэмэтин сайыннарыы киирэллэр.
Ол да буоллар, эрэгийиэн таһымыгар өйөбүлү эрэйэр боппуруостар билигин да бааллар.
Ол туһунан СӨ Ил Дархана Айсен Николаев:
— Бүгүҥҥү мунньах түмүгүнэн бүддьүөт эйгэтин үлэһиттэрин «атын» араҥаларын («ыйаахха» сыһыана суохтары) хамнастарын 6,4 % индексациялааһыны муус устарга көһөрөргө сорудахтаатым. Бу иннинэ индексацияны алтынньыга оҥорорго былааннаабыппыт.
Нэһилиэнньэ нус-хас олороругар өссө биир дьоһун түгэнинэн санкциялар усулуобуйаларыгар мэдиссиинискэй көмө систиэмэтин тэрийии буолар. Доруобуйа харыстабылын министиэристибэтигэр мэдиссиинскэй көмө саҥа схематын оҥорорго, ол иһигэр эмтиир сириэстибэлэри уонна тэриллэри урутаан аҕалыыны хааччыйарга сорудахтаатым. Фармация ырыынагар ыытыллыбыт мониторинг көрдөрөрүнэн, өрөспүүбүлүкэҕэ эмп саппааһа тиийэр. Сыана улаатарын да иһин, бу таһымы өссө да салҕыы илдьэ сылдьыахха наада, -– диэн бүгүҥҥү мунньахха иһитиннэрдэ.
Уопсайынан, өрөспүүбүлүкэ социальнай эйгэтэ билиҥҥи күн-дьыл саҥа ыҥырыыларыгар бэлэм. Ол гынан баран, хайа да түгэҥҥэ сорудахтар бары хаачыстыбалаахтык уонна болдьоҕор толоруллуохтаахтар.
Надежда ЕГОРОВА, «Саха сирэ», edersaas.ru