Владивосток куоракка Уһук Илиҥҥи «МедиаСаммит – 2022” буола турар. “Уһук Илин уокурукка сыыппара кыаҕа» диэн сиэссийэҕэ былаас уорганын үлэтэ ырытылынна.
Кэлиҥҥи кэмҥэ интэриниэт былаһааккатыгар былаас уоргана нэһилиэнньэни кытта хардарыта ситимнээхтик үлэлиирэ үрдээбитэ этилиннэ. Манна сүрүн далаһаны оҥорооччунан Арассыыйа 84 субъегар үлэлиир Эрэгийиэни салайыы кииннэрэ (ЦУР) буолаллар.
«Диалог Регионы» АНО баһылыгын солбуйааччы Вадим Никишин сиэссийэ кэмигэр: «2030 сылга диэри Арассыыйаҕа судаарыстыбаннай салайыы өссө үрдүк таһымҥа тиийиэхтээх. Бары өттүнэн үтүө холобур буолара ситиһиллиэхтээх. Биһиги судаарыстыбаннай өҥөнү оҥорууга уон бастыҥ дойдулар кэккэлэригэр киириэхтээхпит», — диэн кэлэр сыллардааҕы былаан туһунан быһаарда. Санатар буоллахха, 2021 сылга дойду үрдүнэн нэһилиэнньэттэн судаарыстыбаннай өҥө порталыгар 10 мөл тахса ыйытык, этии киирбит, ол аата 5 төгүл үрдээбит. Саха сиринээҕи эрэгийиэни салайыы киинин салайааччыта Василий Десяткин «Билиҥҥи баар балаһыанньаҕа өрөспүүбүлүкэ уонна муниципальнай таһымнаах салайааччылар таһымнарын үрдэтиигэ өрүү кыһаллыахтаахтар», — диэн саамай сөпкө эппит.