Дойду да, өрөспүүбүлүкэ даҕаны салалтата оҕолоох ыалы, кыаммат араҥа, бэтэрээн дьону өйүүргэ кэккэ миэрэлэри киллэрэр. Олортон биирдэстэринэн, хамсык дьаҥынан сибээстээн былырыын олоххо киирбит үстэриттэн сэттэлэригэр диэри саастаах оҕолорго көрүллэр төлөбүр буоларын ыйаллар.
Тустаах төлөбүр чопчу кыра дохуоттаах ыал үһүттэн сэттэтигэр диэри (аҕыстарын туолуохтарыгар диэри ылаллар) саастаах оҕолоругар көрүллэр. СӨ Үлэтин уонна социальнай сайдыытын миниистирэ Елена Волкова иһитиннэрбитинэн, бу төлөбүрү күн бүгүн Саха сирин 50-ча тыһыынча кэриҥэ оҕото ылар эбит. Кээмэйэ, дьиэ кэргэн ханна олороруттан тутулуктанан, быһа холуйан ортотунан 8-10 тыһыынча солкуобайга тэҥнэһэр.
“Тустаах төлөбүр толору сыыппара өҥөтүнэн оҥоһуллар. Ол эбэтэр сайабылыанньаларын электроннайынан биэрэллэрин таһынан, эбии ыспыраапкалары эҥин үлэһиттэр бэйэлэрэ хомуйалар. Бу барыта дьоҥҥо судургу, табыгастаах буоларын туһугар оҥоһуллар”, — диэн миниистир бэлиэтээтэ. Атыннык эттэххэ, бэйэлэрин, оҕолорун чахчыларын эрэ ыыталлар. Онтон атын ирдэнэр ыспыраапкалары социальнай харалта үлэһиттэрэ тэрилтэлэртэн бэйэлэрэ ирдэһэллэр.
Людмила ПОПОВА, “Саха сирэ” хаһыат, edersaas.ru
Хаартыска: Александр ВОЛОЖАНИН.