Нэһилиэнньэ эбиллиитинэн Саха сирэ Арассыыйаҕа сэттис миэстэҕэ сылдьар
СӨ бырабыыталыстыбатын бэрэссэдээтэлин солбуйааччы Ольга Балабкина салайааччылаах бөлөх “Саха” НКИХ уонна Якутия 24 ханаалынан быһа сибээскэ тахсан отчуоттаата.
Ольга Балабкина хамсык кэмигэр 2020 сылга биир даҕаны олоҕу хааччыйар тэрилтэ үлэтэ тохтооботоҕун ыйар. Саҥа быраабылалар тута олоххо киирэн испиттэрин бэлиэтиир. Ол курдук, Ил Дархан Айсен Николаев бары бырайыактары, нуорма-быраап аахталарын 24 чаас иһигэр сөбүлэһэргэ соругу туруорбут. Ол түмүгэр быһаарыы бэрт кылгас кэм иһигэр ылыллыбытын чопчулуур.
Үөрэх кыһаларын оҕолоро кылгас кэм иһигэр ыраахтан олорон (дистанционно) үөрэниигэ көспүттэрин, уһуйаан дьуһуурунай бөлөхтөрө аһыллан үлэлээбиттэрин эттэ. Хамсык дьаҥынан сибээстээн киирбит хааччах түмүгэр, уустук балаһыанньаҕа түбэспит социальнай араҥаҕа көмө тута оҥоһуллубут.
“Ааспыт сыллааҕы статистика чахчытыгар олоҕуран, Саха Өрөспүүбүлүкэтэ дойду атын субъектарыгар тэҥнээтэххэ, сүрүн демографическай көрдөрүүтэ оннунан хаалла, сорохторун тупсардыбыт диэн бигэтик этэр кыахтаахпыт. Кэлиҥҥи алта сылга аан бастакытын, 2020 сылга оҕо төрөөһүнүн ахсаана өлүүнү куоһарда. Бу биир курдук ситиһии, иккис курдук өлүүнү кыччатар туһугар быраастар туох кыалларын барытын оҥорбуттарын өйдүүбүт. Былырыын, 2019 сылы кытта тэҥнээтэххэ, 138 оҕонон элбэх оҕо төрөөтө. Нэһилиэнньэ эбиллиитинэн (по естственному приросту) Саха сирэ Уһук Илин уокурукка бастакы, Арассыыйа эрэгийиэннэрин кэккэтигэр 7-с миэстэҕэ сылдьар”, — диэн бэрэссэдээтэли солбуйааччы иһитиннэрдэ.
Людмила ПОПОВА, “Саха сирэ” хаһыат, edersaas.ru
Хаартыска: Андрей СОРОКИН (СИА).