Саха сирэ кэнники үс сылга нэһилиэнньэ ахсаана эбиллиитинэн Арассыыйа үрдүнэн биэс бастыҥ эрэгийиэн иһигэр киирдэ.
“Новости” информационнай ааҕыныстыба эрэгийиэннэр демографическай балаһыанньаларын көрдөрөр инфографиканы оҥорон таһаарда. Уопсай демографическай балаһыанньанан Саха сирэ 12-с миэстэлээх, оттон “2018-2020 сылларга нэһилиэнньэ ахсаанын эбиллиитэ” көрдөрүүнэн биэс бастыҥ эрэгийиэн иһигэр киирдэ.
Рейтини эспиэрдэр “Росстат” дааннайдарыгар олоҕуран оҥорбуттар. Нэһилиэнньэ элбээһинин, көҕүрээһинин, оҕо төрөөһүнүн, дьон көһөн барыытын, өлүүтүн, о.д.а. көрдөрүүлэри учуоттаабыттар. Онон өрөспүүбүлүкэ оҕо төрөөһүнүнэн 5-с миэстэҕэ (14,9 тыһыынча), миграционнай эбиллиинэн 23-с миэстэҕэ (2,8 тыһыынча), уопсай эбиллиинэн (1,8%) 85 эрэгийиэнтэн 12-с миэстэҕэ тахсыбыт.
Оҕо төрөөһүнүгэр Саха сирэ туспа өйүүр миэрэлэри ылыммыта: оҕо 3 сааһын туолуор диэри ый аайы 18 559 солкуобай төлөнөр, бастакы оҕо төрөөтөҕүнэ 37 тыһыынчаттан тахса солкуобай биирдэ бэриллэр. Иккис оҕо төрөөтөҕүнэ, эрэгийиэннээҕи Ийэ хапытаала (федеральнай Ийэ хапытаалын 30%-на), үһүс уонна онтон кэлэр оҕоҕо өрөспүүбүлүкэтээҕи Ийэ хапытаала (140 тыһыынча солкуобай) төлөнөр. Бу барыта өрөспүүбүлүкэтээҕи бүддьүөттэн барар. Элбэх оҕолоох ыалларга сир учаастактара бэриллэллэр, дьиэ тутталларыгар, атыылаһалларыгар көмө баар.
“Об охране семьи, материнства, отцовства и детства” сокуон үлэлиир буолан, оҕолоох ыаллары өйүүр миэрэлэр элбэхтэр. Ону тэҥэ, бу сыл кулун тутар 31 күнүгэр Ил Дархан Айсен Николаев доруобуйа харыстабылын систиэмэтин сайыннарыы, дьон-сэргэ доруобуйатын бөҕөргөтүү туһунан ыйааҕа демографияны сайыннарарга эмиэ туһуланар. Ол чэрчитинэн, 2021-2030 сыллары Доруобуйа 10 сылынан биллэрэн, үлэ саҕаланна. Сүрүн соруктарынан генетиканы, науканы сайыннарыы, доруобуйа харыстабылын эйгэтин үрдүк квалификациялаах каадырдарынан хааччыйыы, киһи бэйэтин доруобуйатыгар эппиэтинэстээхтик сыһыаннаһарын ситиһии, о.д.а. буолаллар. Бу барыта нэһилиэнньэ доруобуйата тупсарыгар, уһун үйэлээх буоларыгар, оҕо төрөөһүнэ элбииригэр туһуланар.
Ангелина Васильева, «Саха сирэ» хаһыат, edersaas.ru
Хаартыска: mintrud.sakha.gov.ru