Нэһилиэнньэ Бүтүн Арассыыйатааҕы биэрэпиһин ыытыллар болдьоҕо бигэргэннэ
Бырабыыталыстыба Бэрэссэдээтэлэ Михаил Мишустин «Арассыыйа Федерацията 2019 с. ахсынньы 7 күнүгэр таһаарбыт ыйааҕар уларытыылары киллэрэр туһунан» 1347 №-дээх уураахха илии баттаата.
edersaas.ru
Бу уураах быһыытынан, Бүтүн Арассыйатааҕы нэһилиэнньэ биэрэпиһэ алтынньы 15 күнүттэн саҕалаан, сэтинньи 14 күнүгэр диэри, оттон ыраах сытар, суола-ииһэ суох нэһилиэнньэлээх пууннарга ахсынньы 20 күнүгэр диэри ыытыллыаҕа. Санатан эттэххэ, бу биэрэпис былырыын ыытыллыахтааҕа пандемиянан сибээстээн быйылгыга көһөрүллүбүтэ.
Быйылгы биэрэпис уратытынан дойду олохтоохторо судаарыстыба өҥөтүн порталыгар (Gosuslugi.ru) биэрэпис илииһин электроннай көрүҥүнэн толоруулара буолуоҕа. Оттон дьиэлэринэн кэрийэ сылдьан биэрэпиһи оҥорооччулар анал бырагырааманан хааччыллыбыт планшеттары туһаныахтара. Ону таһынан, гражданнар бэйэлэрэ биэрэпис учаастактарыгар, ол иһигэр «Мои документы» (судаарыстыба уонна миниципалитет өҥөлөрүн оҥорор) кииҥҥэ биэрэпистэнэр кыахтаахтар. Судаарыстыба өҥөтүн порталыгар биэрэпис илииһин алтынньы 15 күнүттэн сэтинньи 8 күнүгэр диэри толоруллар. Бу туһунан Судаарыстыбыннай статистика Саха сиринээҕи салаата иһитиннэрэр.
Раиса Сибирякова, «Саха сирэ» хаһыат, edersaas.ru