Нэһилиэктэри сайыннарыыга 1,3 млрд солкуобай көрүллүөҕэ

Ааптар: 
Бөлөххө киир:
РФ Тыа хаһаайыстыбатын министиэристибэтэ уонна СӨ Бырабыыталыстыбата сөбүлэҥ түһэрсиилэрин чэрчитинэн, быйыл «Тыа сирин кэлимник сайыннарыы» бырагырааманы олоххо киллэриигэ 1 миллиард 334 мөлүйүөн солкуобай көрүллүөҕэ.
Бу сууматтан 98%-на — федеральнай үбүлээһин.
Саха сирэ саамай элбэх сууманы ылар эрэгийиэннэр ахсааннарыгар сылдьар. Бу СӨ Тыа хаһаайыстыбатын министиэристибэтэ улуустары кытта тахсыылаахтык бииргэ  үлэлээбитин түмүгэ, — диэн бэлиэтээбитэ Ил Дархан Айсен Николаев.
СӨ Тыа хаһаайыстыбатын министиэристибэтин пресс-сулууспата иһитиннэрбитинэн, 2022 сыллааҕы «Тыа сирин кэлимник сайыннарыы»  бырагыраамаҕа өссө 10 улуус киирэргэ бэлэм.
1,2 млрд солкуобай Үөһээ Бүлүү, Нам, Сунтаар, Уус Алдан, Хаҥалас уонна Чурапчы улуустарыгар тыырыллан ыытыллыаҕа.
Бырагыраама чэрчитинэн Үөһээ Бүлүү Кырыкыйыгар култуурунай-спортивнай комплекс, Харбалаҕа  оҕо саада, Сунтаар Күндэйэтигэр  50 миэстэлээх оҕо саада, Сунтаар бөһүөлэгэр бассейннаах спортивнай комплекс, ону тэҥэ Уус Алдан Сыырдааҕар  уонна Хаҥалас Үөдэйигэр оскуола тутуллуохтара. Туора Күөлгэ — оскуола-саад, Үрүҥ Күөлгэ (Чурапчы) — култуура киинэ, Уус Күөлгэ (Уус Алдан) — оҕо саада тутуллуохтара.
Хамаҕаттаҕа (Нам)  — спортивнай саала хапытаалынай өрөмүөнэ, Үөһээ Бүлүү Хомустааҕар уонна Сунтаар улууһун киинигэр уоту киллэрии үлэлэрэ ыытыллыахтара. Чурапчы Мындаҕаайытыгар 120 миэстэлээх оскуола тутуллуоҕа. Сунтаар, Уус Алдан уонна Чурапчы улуустарыгар 6 массыына бэриллиэхтээх, былааҥҥа турар.
Быйыл «Тыа сирин кэлимник сайыннарыы» бырагыраама чэрчитинэн 10,5 мөлүйүөн солкуобай тыа сирин тупсарыыга ыытыллыаҕа, 4  уопсастыбаннай суолталаах бырайыак олоххо киириэҕэ.  Нам улууһун Партизан нэһилиэгэр  «Мыымах» кыбаарталга 50  дьиэ тутуута салҕаныаҕа.
Бу туһунан СӨ Тыа хаһаайыстыбатын министиэристибэтин пресс-сулууспата иһитиннэрдэ.

Елена ПОТОЦКАЯ, “Саха сирэ” хаһыат, edersaas.ru

Хаартыска: СӨ Тыа хаһаайыстыбатын министиэристибэтин пресс-сулууспата

+1
0
+1
0
+1
0
+1
0
+1
0
+1
0
+1
0