Нэһилиэктэр мадьынылара күөн көрсүөхтэрэ

Ааптар: 
Бөлөххө киир:

Кэлэр ый саҕаланыыта Дьокуускайга мас тардыһыытыга өрөспүүбүлүкэ нэһилиэктэрин икки ардыларынааҕы күрэхтэһии буолуоҕа. Бу туһунан бэҕэһээ, кулун тутар 10 күнүгэр, «Тэтим» араадьыйаҕа «Тайм-аут» биэриигэ кэпсээтилэр.

Николай Бястинов ыытааччылаах «Тайм-аут» биэриигэ күрэхтэһии тэрийээччитэ, Нам улууһун 2-с Хомустаах нэһилиэгин баһылыга Лев Новгородов уонна СӨ мас рестлиҥҥэ федерациятын толорооччу дириэктэрэ Петр Колодезников ыалдьыттаатылар. Кинилэр буолаары турар сонун күрэс туһунан маннык иһитиннэрдилэр:

— Нэһилиэктэр икки ардыларынааҕы мас тардыһыыга күрэхтэһиибитин Нам улууһун 2-с Хомустаах нэһилиэгэ төрүттэммитэ 390 сылыгар анаан ыытан эрэбит. Күрэхтэһиибит Дьокуускайга «Модун» успуорт киинигэр муус устар 2-3 күннэригэр буолуоҕа. Хамаандаҕа 18-55 саастаах сэттэ киһи киирэр: биир дьахтар, алта эр киһи. Аны балаһыанньа быһыытынан, манна улуус кииннэрэ кыттыбаттар. Ол эбэтэр 2500 киһиэхэ диэри нэһилиэнньэлээх нэһилиэктэр кыттыахтара. Бу нэһилиэктэр кыахтарын көрөннөр, иккилии даҕаны хамаанданы туруоруохтарын сөп.

Ыйааһыннарынан бардахха, дьахтар 50 киилэҕэ диэри, эр дьон 60, 65, 75, 85, 95 уонна 95 киилэттэн үөһээ ыйааһыннаахтар кыттыахтара.

Сонун күрэхтэһиигэ успуорт биирдиилээн киирсии көрүҥнэригэр (единоборство) маастардар кыттыбаттар. Оттон 18 сааһыгар диэри Саха сирин таһымыгар, атын сирдэргэ даҕаны тиийэн күрэхтэспит буоллаҕына, күрэхтэһиигэ ааһар. Итиэннэ физкултуура уонна успуорт салаатыгар үөрэнэ сылдьар устудьуоннар эмиэ күрэхтэһиигэ аһардыбаттар. Тэрийээччилэр бастаабыт нэһилиэккэ убаһалары бириис гынан үөрэ-көтө тиэрдиэхтэрэ.

Нэһилиэккэ үлэлиир-хамныыр, дьарыктанар киһи ааттаах-суоллаах мадьынылары, бөҕөстөрү кытта улахан күрэхтэһии түһүмэхтэрин ааһан кыттара, кыайара уустуктардаах. Онон тыа киһитэ күрэхтэһэригэр, бэйэтин тургутан көрөрүгэр бэртээхэй күрэхтэһии тэриллэн эрэр.

СИА хаартыската.

+1
0
+1
0
+1
0
+1
0
+1
0
+1
0
+1
0