Үөһээ Бүлүү улууһун Мэйик нэһилиэгин олохтоохторо бу күннэргэ икки туомнаах «Мэйик» диэн кинигэни илиилэригэр тутаннар үөрүүлэрэ мунура суох.
Чахчы, астык кинигэ. Ааҕа олордоххуна, Мэйиккэ олорон, үлэлээн ааспыт дьоммут-сэргэбит бу баардыы көстөн кэлэргэ дылылар. Оннооҕор былыр суох буолбут, умнубут дьоҥҥун кытта санааҕар кэпсэтэр курдуккун. Нэһилиэк баай, дириҥ устуоруйата киллэриллибитэ болҕомтону тардар. Онон бу күннэргэ эдэрдиин-эмэнниин бары умсугуйан ааҕа сылдьабыт.
Кинигэни тутан олорон матырыйаалы хомуйан, сааһылаан, чочуйан, бэчээттээн, уруһуйдарын ис хоһоонугар сөп түбэһиннэрэн оҥорбуттарын бары сөхтүбүт. Ааптар нэһилиэккэ олорон ааспыт дьону кими да көтүппэтэх. Бу чахчы дойдутун дьонун үчүгэйдик билэр, кинилэрдиин алтыспыт киһи үлэтэ. Улаханнык кыһаллан, сүрэҕин сылааһын, иэйиитин анаан, өр сылларга иитиэхтии сылдьыбыт санаатын тиспитэ үөрдэр, долгутар. Маннык дьоһун дьонноох буоламмыт кинигэ тахсан, оҕолорбутугар, сиэннэрбитигэр улахан суолталаах бэлэх буоллаҕа.
Икки сылы быһа сыралаһан, түбүгүрэн кинигэни таһааттарбыт дьоммутугар, өрөспүүбүлүкэбит улуустарыгар олорор биир дойдулаахтарбыт махтал маанылаах тылларын эппиттэрэ истэргэ наһаа үчүгэй. Бу дойдуларын ахта-саныы сылдьар дьоҥҥо икки бүк улахан бэлэх буолбута саарбахтаммат. Онтон нэһилиэкпит баһылыга М.М.Хаччагаев: «Бу Мэйик энциклопедията да буолуон сөп», — диэн улахан сыанабылы биэрэр.
Биһиги үөрүүлээх сонуммутун кэпсээн туран, өссө төгүл ис сүрэхтэн тахсар хайҕал, махтал тылларбытын кинигэ тахсыытыгар үлэлэспит дьоммутугар аныыбыт. Ааптар Владимир Афанасьевич Федоровка, кинигэ уһун унньуктаах «айанын» тулуйан, сааһылаан бэчээттээбит Галина Абрамовна, Туйаара Васильевна Ивановаларга, матырыйааллар ис хоһоонноругар сөп түбэһиннэрэн олус бэркэ уруһуйдаан ситэрэн-хоторон биэрбит Игорь Иванович Яковлевка, кинигэҕэ көмөлөспүт Мэйик дьонун үлэлэрин үчүгэйдик билэр, кинилэрдиин өр кэмҥэ алтыспыт ытык дьоммутугар Василий Илларионович Герасимовка, Василий Николаевич Ивановка. Барыбытын кинигэҕитинэн үөрдүбүккүтүгэр барҕа махтал. Этэҥҥэ доруобай буолуҥ.
Валентина Попова,
Мэйик, Үөһээ Бүлүү.