Үөрэҕирии сайдыытын институтун үлэһитэ Гаврил Адамов 2013 сыллаахха өрөспүүбүлүкэ нэһилиэктэрин саҥа талыллыбыт эдэр баһылыктарын сахалыы тыыҥҥа, үлэҕэ-хамнаска сыһыарар сыаллаах бырайыагы оҥорбутун Ыччат уонна дьиэ кэргэн бэлиитикэтин министиэристибэтэ иилэ хабан ылбыта.
Ол түмүгэр, «Нэһилиэк» бырайыак» диэн уопсастыбаннай тэрилтэ баар буолбута, сүрүннээччинэн, оччолорго ыччат миниистирин бастакы солбуйааччы, Гаврил Семенов анаммыта.
Күн бүгүн «Нэһилиэк» бырайыак» уопсастыбаннай тэрилтэ сүүрбэ чилиэнэ бары араас улуустар нэһилиэктэрин дьаһалталарын баһылыктара, 38-тарыгар диэри саастаах эдэр дьоннор. Кинилэр нэһилиэктэригэр үлэни-хамнаһы тэрийэргэ, ыччаты олохсутарга тирэх буолар араас бырайыактарынан таһаарыылаахтык үлэлии-хамсыы сылдьаллар. «Нэһилиэк» бырайыак чэрчитинэн өрөспүүбүлүкэ таһымнаах форумнары, уопсастыбаннай уонна спортивнай дьаһаллары тэрийэллэр, үлэ үөрүйэхтэрин атастаһаллар. Тыа сиригэр толору хааччыллыыны киллэрэргэ, тыа хаһаайыстыбатын бородууксуйатын оҥорон таһаарыыга итиэннэ араас киэптээх хаһаайыстыбалары сайыннарыыга инновационнай бырайыактары олоххо киллэрэллэр.
Москваҕа бу күннэргэ ыытылла турар Аан дойдутааҕы научнай-практическай ассамблеяҕа Ньурба улууһун Дьаархан нэһилиэгин баһылыга Александр Иванов, Амма улууһун Чакыр нэһилиэгин баһылыга Прокопий Прокопьев уонна Сунтаар улууһун Элгээйи нэһилиэгин баһылыга Гаврил Яковлев «Нэһилиэк» бырайыак» уопсастыбаннай тэрилтэ холобуругар тыа сиригэр ыччаты олохсутарга туһуламмыт бырайыактарынан ыытыллар үлэни-хамнаһы билиһиннэрдилэр, муниципальнай тэрээһиннэр икки ардыларыгар бииргэ үлэлээһин уопутун сырдаттылар.
Ил Дархан уонна Бырабыыталыстыба дьаһалталарын бэрэстэбиитэлэ Сардаана Алексеева:
— Ассамблея кыттыылаахтара Саха сирин бырайыагын олус сэҥээрдилэр. Кэнгириэс салалтата биһиэхэ тэрилтэлэр салгыы бииргэ үлэлииллэрин туһунан боппуруоһу көрөрбүтүгэр, оттон регионнар бэрэстэбиитэллэрэ уонна ассамблея кыттыылаахтара олохтоох салайыы тирээн турар кыһалҕаларын тула дьүүллэһиилэри тэрийэргэ эттилэр.
Раиса СИБИРЯКОВА, “Саха сирэ” хаһыат, edersaas.ru