Нэһилиэгин дьонун үйэтиттэ

Бөлөххө киир:

Аҕа дойдуну көмүскээччилэр күннэрин көрсө Нам улууһун I Хомустааҕар саҥа кинигэ сүрэхтэниитин сэргэ, сэргэх тэрээһиннэр ыытылыннылар.

edersaas.ru

Олунньу 22 күнүгэр «Эйгэ» модельнай бибилэтиэкэ саалатыгар бэйиэт, СӨ Суруналыыстарын уонна СӨ Суруйааччыларын сойуустарын чилиэнэ, Нам улууһун “Отуу уота” литературнай түмсүү чилиэнэ Анатолий Михайлович Софронов-Онтуон «Ытык иэс» кинигэтин сүрэхтэниитэ киэҥ далааһыннаахтык ааста.
Бу  киэһэ ыҥырыылаах ыалдьыттар кинигэ  тула санааларын үллэһиннилэр, биир дойдулаахтарыгар Онтуоҥҥа  дириҥ  махталларын биллэрдилэр.
Ааптар кинигэтигэр төрөөбүт-үөскээбит, олохсуйан олорор нэһилиэгин кырдьаҕастарын, аҕам саастаахтарын, биэнсийэҕэ саҥа тахсыбыт, I Хомустаахха олохсуйбут дьон аармыйатааҕы олохторун сырдаппыт.
«Кинигэбэр 160-ча киһи ахтыыта киирбитэ кэнэҕэски ыччаттарбытыгар үтүө өйдөбүл буолуо, сүдү суолтата өссө улаатыа диэн бигэ эрэллээхпин», -– диэн ааптар кинигэтин туһунан билиһиннэрдэ. Кырдьыга да, ыччаты дойдуга бэриниилээх буолууга иитэр аналлаах өссө биир кинигэ күн сирин көрдөҕө.
Кинигэ хас биирдии дьоруойугар  иккилии хаартыскалаах, кылгас автобиографическай ыйынньыктаах.
Ураты буочардаах Анатолий Софронов-Онтуон суруйар тиэмэтэ киэҥ уонна кэскиллээх. Эдэр сылдьан волейболга, баскетболга тэҥнээҕин булбатах спортсмен Анатолий Софронов успуорт араас түгэннэрин өрөспүүбүлүкэ хаһыаттарыгар  элбэхтик сырдатар  суруналыыс. Кини -– успуорт уонна үлэ бэтэрээнэ, «СахаВА» бэтэрээнэ, СӨ физической култууратын уонна спордун туйгуна, «Нам улууһугар кылаатын иһин» бочуоттаах бэлиэнэн наҕараадаламмыта. Кини хоһооннорун мелодистар ырыа гынан көтүтэллэр.

Бэйиэт Онтуон атын жанрынан суруйбут бу  кинигэтин сүрэхтэниитин күнэ мээнэҕэ талыллыбатах. Ол курдук, истиҥ көрсүһүү киэһэтэ «Алгыс» НАК, «Эйгэ» бибилэтиэкэ кэлэктииптэрин тэрийиилэринэн ырыа-тойук аргыстаах, аармыйа олоҕун санатар сэттэ түһүмэхтэн турар көрдөөх оонньуулаах түмүктэннэ.

Бу да сырыыга оонньуу мүччүргэннээх түгэннэрэ успуорт суруналыыһыгар  эдэр сааһын эргиттилэр, онтон бэйиэккэ успуорду уруйдуур-айхаллыыр хоһоон хомоҕой тыллара киирэн ааспыттара саарбаҕа суох. Онон, аныгыскы, 11-с  кинигэҥ сүрэхтэниитигэр көрсүөххэ, диэри Анатолий Михайлович!

Надежда ЕГОРОВА, «Саха сирэ» хаһыат, edersaas.ru

Ааптар хаартыскалара.

+1
0
+1
0
+1
0
+1
0
+1
0
+1
0
+1
0