“ПРОконсолидация – Якутия” диэн эрэгийиэн иһинээҕи бырайыак аны федеральнай таһымҥа таҕыста. Ол “ПРОконсолидация – Якутия” бырайыак салайааччыта Петр Чехордун Норильскайдааҕы бырамыысыланнай хампаанньаларга идэлээх каадырдары үлэҕэ угуйар соруктаах сөбүлэҥ түһэрсибиттэрин туһунан иһитиннэрдэ. Бэлиэтээн эттэххэ, “Навахту14” бырайыак олохтоох ыччаты бырамыысыланнас салаатыгар үлэлэтэригэр тирэх буолан “Олохтоох каадыры- бырамыысыланнаска” диэн өрөспүүбүлүкэтээҕи бырагыраама аны кэҥээн бырайыагы РФ Арктическай сиригэр-уотугар киэҥник тарҕатыы үлэтэ саҕаланарын туһунан сырдатта.
Петр Чехордун, «ПРОконсолидация – Якутия” бырайыак салайааччыта:
— Ил Дархан Айсен Николаев этиитинэн тэриллибит “Навахту.РФ” бырайыак Арктическай эрэгийиэннэргэ кэҥиир буолла. Ол курдук, муус устар 18 күнүгэр Москуба куоракка “Корпорация развития Дальнего Востока” (Уһук Илин сайдыытын корпорацията) уонна Уһук Илини сайыннарыыга министиэристибэ туһааннаах тэрилтэлэргэ бэйэлэрин ньымаларын көмүскээтэ. Муус устар 20 күнүгэр Норильскайга буолбут «Профи 2022” норуоттар икки ардыларынааҕы пуорум чэрчитинэн сөбүлэҥ түһэристибит. Сөбүлэҥмит биһиги үлэбит-хамнаспыт Саха сиригэр эрэ буолбакка, Арктическай эрэгийиэннэргэ туһалааҕын көрдөрөр. Билигин бырайыак Саха сиригэр сүрүннээн бырамыысыланнай эйгэҕэ дьону үлэҕэ киллэрэргэ көмөлөһөр эбит буоллаҕына, бырайыакпыт федеральнай аата «Проконсолидация Арктика” диэн кэҥээтэ.
“ПРОконсолидация Якутия” бырайыак өрөспүүбүлүкэ иһинэн үлэлиир бырайыак. Онон бу тэрилтэбит саҥа аата бырамысыланнай хампаанньалары сэргэ Арктическай эрэгийиэннэргэ баар бүддьүөт тэрилтэлэригэр эмиэ сүүмэрдээн дьону хомуйарга үлэлиирбитигэр тирэх буолуоҕа. “ПРОконсолидация Якутия” Саха сиригэр баар тэрилтэлэргэ өрөспүүбүлүкэ олохтоохторун бэлэмнээн, үөрэтэн, үлэ биэрэр тэрилтэлэри кытта тиксэрэр эбит буоллахпытына, билигин федеральнай түһүмэх кэрчигинэн киин эрэгийиэннэртэн үлэлиэн баҕалаах дьону хомуйан, тэрийэн, үөрэтэн, Арктическай эрэгийиэннэргэ үлэбитин саҕалыахпыт.
Ульяна ЗАХАРОВА.