Култуура

«Науруз» түүр норуоттарын бэстибээлэ арылынна

Казань куоракка Науруз XV норуоттар икки ардыларынааҕы тыйаатырдар бэстибээллэрэ 15 төгүлүн ыытыллар.

Бу бэстибээлгэ Саха сириттэн икки тыйаатыр: Былатыан Ойуунускай аатынан Саха академическай драматическай тыйаатыр уонна Олоҥхо тыйаатыра кыттыыны ыларын туһунан СӨ Култууратын министиэристибэтин пресс-киинэ иһитиннэрэр.
Бэстибээли арыйыы бэс ыйын 7 күнүгэр Г.Камал аатынан тыйаатыр сыанатыгар ыытылынна. Бэстибээл кыттыылаахтарын уонна ыалдьыттарын Татарстан култууратын миниистирэ Ирада Аюпова эҕэрдэлээтэ, тыйаатыр бэстибээлин кытары тэҥҥэ Казань куоракка Саха сирин күннэрэ ыытыллалларын бэлиэтээтэ. Ирада Аюпова бэстибээли арыйыы үөрүүлээх чааһыгар биир идэлээҕэ СӨ култууратын уонна духуобунай сайдыытын миниистирэ Юрий Куприянов итинэннэ Казань тыйаатырын бэстибээлин «өрдөөҕүттэн доҕоро уонна быраата» Арассыыйа народнай артыыһа, Саха тыйаатырын уус-уран салайааччыта, номох буолбут режиссер Андрей Борисов кэлэн олороллорун бэлиэтээн эттэ.

«Хас биирдиибит кимтэн кииннээхпитий, хантан хааннаахпытый? Ханна тиийиэхтээхпитий? диэн ыйытыыларга хоруй көрдүүбүт…Науруз тыйаатыр бэстибээлэ туруорар боппуруостарыгар «биһиги эһигини кытары биир инникилээхпит» диэн сүрүн уонна суолталаах хоруйу биэриэхпит диэн эрэнэбин» диэн Татарстан култууратын миниистирэ түмүктээтэ.

Бэстибээлгэ Саха сириттэн кыттар икки тыйаатыр Андрей Борисов туруоруутугар испэктээкиллэри көрдөрүөхтэрэ. Бэс ыйын 8 күнүгэр киэһэ 21.55  Казаньҥа Саха сирин күннэрин арыллыытыгар Олоҥхо тыйаатыра аһаҕас халлаан анныгар «Улуу Кудаҥса» испэктээги көрдөрүөҕэ. Бэс ыйын 9 күнүгэр Былатыан Ойуунускай аатынан Саха драматическай тыйаатыра Камал аатынан тыйаатыр сыанатыгар Саха тыйаатыра «Алитет хайаҕа күрүүр» испэктээкили сүрэхтиэҕэ.

«Науруз» тыйаатыр бэстибээлин арыйыы иннигэр СӨ Бырабыыталыстыбатын бэрэссэдээтэлин солбуйааччы Сергей Местников уонна СӨ култууратын миниистирэ Юрий Куприянов Камал аатынан тыйаатыр 3D экрааннаах, Татарстан тыйаатырын историятын көрдөрөр голограммалаах толору интерактивнай былаһааккалаах тыйаатыр мусуойун экспозициятын кытары билистилэр.

Бэс ыйын 6-11 күннэригэр XV төгүлүн ыытыллар Норуоттар икки ардыларынааҕы «Науруз» түүр омуктар тыйаатырдарын бэстибээлэ Казань куоракка ыытыллар. Бэстибээл бырагыраамматыгар Казахстантан, Кыргызстантан, Туркменистантан, Узбекистантан, Таджикистантан уонна Россия национальнай өрөспүүбүлүкэлэриттэн барыта 28 тыйаатыр кыттыыны ылар, 500-тэн тахса кыттааччылаах. Бэстибээл «Айар дьоҕурдаах дьон» «Творческие люди» федеральнай бырайыак иһинэн «Култуура» национальнай бырайыак чэрчитинэн ыытыллар.

0
0