Бүгүн СӨ Наукаларын академиятын отчуоттуур-быыбардыыр уопсай мунньаҕа буолла. Бэрэсидьиэнинэн үһүс төгүлүн Игорь Иннокентьевич Колодезников талылынна.
edersaas.ru
Куоластааһын иннинэ, СӨ Наукаларын академиятын подраздениеларын 2017 сыллааҕы научнай уонна научнай-тэрийэр үлэлэрин туһунан кылаабынай учуонай сэкирэтээр Юрий Григорьев кэпсээтэ. Салгыы 2013-2017 сыллардааҕы СӨ Наукаларын академиятын президиумун үлэтин туһунан бэрэсидьиэн Игорь Колодезников отчуоттаата.
Дьэ, ол кэнниттэн кистэлэҥ куоластааһыҥҥа киирдилэр. Мунньахха, уопсайа, 49 киһи (ол иһигэр 29 дьиҥнээх чилиэн) кыттыбытыттан, бары сүүс бырыһыан бу сылларга үлэлээн кэлбит Игорь Иннокентьевич Колодезниковка куоластаатылар. Санатан эттэххэ, Игорь Колодезников СӨ Наукаларын академиятыгар бэрэсидьиэнинэн 2008 сыл ыам ыйыгар талыллыбыта, 2013 сыл муус устар ыйыгар хаттаан талыллыбыта. Бүгүн үһүс болдьоҕор быыбарданна.
Ыспыраапка
СӨ Наукаларын академиятын бэрэсидьиэнэ. Геологическай-минералогическай наука дуоктара (1992), бэрэпиэссэр (1993), 1993 сылтан СӨ Наукаларын академиятын дьиҥнээх чилиэнэ.
1941 с. алтынньы 27 күнүгэр Дьокуускай куоракка төрөөбүтэ.
1965 с. — Саха Судаарыстыбаннай университет инженернэй-техническэй бакылтыатын инженер-геолог идэлээх бүтэрбитэ.
1966-1967 сс. – ССРС Геологияҕа министиэристибэтин Саха сиринээҕи геологияҕа управлениетын старшай тиэхиньик-геолога, инженер-геолога.
1968-1971 сс. – ССРС Мингео Саха сиринээҕи геологияҕа управлениетын Тематическай эспэдииссийэтин этэрээтин начаалынньыга, партия начаалынньыга.
1967-1978 сс. – СГУ инженернэй-техническэй бакылтыатын ассистена, старшай преподавателэ, доцент.
1978-1983 сс. – ССРС НА СС Саха сиринээҕи филиалын Геологияҕа институтун старшай научнай сотруднига.
1983-2008 сс. – СГУ доцена, хаапыдыра сэбиэдиссэйэ, бэрэпиэссэр, Геологоразведочнай бакылтыат декана.
2001-2008 сс. – СӨ Наукаларын академиятын вице-бэрэсидьиэнэ.
2008 с. – бүгүҥҥү күҥҥэ диэри СӨ Наукаларын академиятын бэрэсидьиэнэ.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн.