Балаҕан ыйын 22 күнүгэр “Арассыыйа – мин историям” история пааркатыгар Наука VI бэстибээлэ буолуоҕа. Научнай тэрээһиҥҥэ сыллата тыһыынчанан киһи сылдьар. Тэрийээччилэр, ХИФУ научнай-чинчийэр үлэҕэ управлениета бэлиэтииринэн, сылын аайы көрөөччү ахсаана эбиллэн иһэр.
edersaas.ru
Улахан тэрээһиҥҥэ өрөспүүбүлүкэ үрдүк үөрэҕин кыһалара, наука уонна үөрэх тэрилтэлэрэ кыттыахтара, уопсайа, 130-тан тахса экспозицияны туруоруохтара. ХИФУ устудьуоннар, эдэр учуонайдар уонна исписэлиистэр научнай-чинчийэр үлэлэрин тэрийиигэ салаатын начаалынньыга Нинель Малышева иһитиннэрбитинэн, экспозиция хайысхата олус киэҥ буолан, хас биирдии көрөөччү бэйэтин интэриэһинэн сөптөөх былаһаакканы талыаҕа.
“Наука бэстибээлин оҕотуттан кырдьаҕаһыгар тиийэ бары интэриэһиргииллэр. Аҕа көлүөнэ наука туох эрэ уратытын, сонунун сэҥээрэр. Оскуола үөрэнээччилэрэ сөптөөх идэни талалларыгар көмөлөһүннэрэллэр эбэтэр номнуо талбыт идэлэрин туһунан иҥэн-тоҥон билсэллэр. Оттон кырачааннарга наука алыптаах аана арыллар”, — диэн Нинель Малышева кэпсиир.
Көрөөччүлэри наука саҥа оҥоһуктарын презентациялара, араас прибордар, тэриллэр хайдах үлэлииллэрин билиһиннэриэхтэрэ, научнай киинэлэри көрдөрүөхтэрэ, Саха сирин биллэр-көстөр учуонайдара лиэксийэлэри ааҕыахтара. Ыалдьыттар робототехника, көмпүүтэр технологиятын эйгэтигэр саҥа оҥоһуктары эрэ буолбакка, бэстибээл интерактивнай уонна мультимедийнэй экспозицияларын үлэтигэр кыттыахтара.
ХИФУ пресс-сулууспата.