Наука тирэх оскуолалара сөбүлэҥ баттастылар
Олох-дьаһах

Наука тирэх оскуолалара сөбүлэҥ баттастылар

Былырыын ахсынньыга Дьокуускайдааҕы лицей уонна Владимир Ларионов аатынан физика техническэй лицейэ Арассыыйа академиятын наукатын тирэх оскуолаларын аатын ылбыттара.

edersaas.ru

Биллэн турар, РФ эригиэйннэрин бары оскуолаларыгар кытаанах сиидэлээһин ыытыллыбыт. Онно 108  оскуоланы наука эйгэтигэр “буспут-хаппыт” үөрэх тэрилтэлэрин быһыытынан талбыттар. Бу оскуолалартан иккитэ – Саха сириттэн.

Мин Арассыыйа наукаларын академиятын Саха сиринээҕи научнай киинин 70 сылыгар анаммыт үбүлүөйдээх тэрээһин чэрчитинэн ыытыллар «Арассыыйа наукаларын академиятын Сибиирдээҕи отделениетын Саха сиринээҕи научнай киинэ» диэн ыччат бастакы кэмпириэнсийэтигэр кытта сылдьар Дьокуускайдааҕы лицейгэ 1998 сылтан учууталынан, 2013 сылтан бу үөрэх кыһатын дириэктэринэн үлэлиир Иван Сидоровы кытта көрсөн анаан кэпсэттим.

— Биһиги оскуолаларбыт бу маннык эппиэттээх сүүмэрдээһини Бүтүн сойуустааҕы олимпиадаларга актыыбынайдык кыттыыларынан, БКЭ уонна ОГЭ эксээмэннэр түмүктэринэн ааспыппыт. Оҕолорбут социальнай-экэнэмиичэскэй, естественнэй, социальнай-гуманитарнай наука хайысхаларыгар ылсан үлэлииллэр. 1993 сылтан ыла бүтэрбит араас научнай олимпиадаларга, кэмпириэнсийэлэргэ кыттыбыт кыахтаах оҕолорбут ситиһиилэрин кэтээн көрөбүт. Кинилэр истэригэр наука кандидаттарынан буолбут оҕолор үгүстэр. Биһиги бүгүн Арассыыйа наукаларын академиятын Сибиирдээҕи отделениетын Саха сиринээҕи научнай киинин кытта сөбүлэҥ түһэристибит. Оҕону эбии үөрэхтээһин чэрчитинэн саха учуонайдара биһиги үөрэнээччилэрбитин кытта научнай чинчийии салаатыгар бииргэ үлэлиэхтэрэ, — диэн  Дьокуускайдааҕы лицей дириэктэрэ Иван Сидоров кэпсээтэ.

 

Бу үөрэх кыһатын 9-с “б” кылааһын үөрэнээччитэ Тимур Александров лицей 8 бастыҥ үөрэнээччитин кытта кэмпириэнсийэҕэ кытта кэлбит. Кини дьиэ усулуобуйатыгар кымырдаҕаһы иитэр эбит!

— Мин интэриниэтинэн анал тэрили атыылаһан  баран, Кытайтан сакаастаан, дьиэбэр  кымырдаҕас ылан ииттэ сылдьабын. Даачаҕа олорон, бастаан утаа үс саастаахпыттан кымырдаҕаһы көрөөт, интэриэһиргээбитим. Ол ону наһаа үчүгэйдик өйдүүбүн. Онтон ыла дьоммуттан наар кымырдаҕас туһунан кинигэни ылалларыгар көрдөһөр этим. Бэһис кылааска сылдьан дьиэбэр кымырдаҕас иитиэхпин баҕарарбын истэн баран дьонум: «Ол тоҕо дьиэҕэ ииттиҥ?» – диэн сөбүлээбэтэхтэрэ. Онтон бу кырдьык хоббим буоларын билэн, икки сыллааҕыта аҕам өйөөн олохтоохтук ылыстым. Научнай чинчийиибин учуонай Михаил Черосов кэлэн интэриэһиргээбититтэн олуһун астынным уонна үөрдүм, — диэн кэпсиир Тимур.

Ити курдук, Арассыыйа наукаларын академиятын Саха сиринээҕи научнай киинин 70 сылыгар анаммыт үбүлүөйдээх тэрээһин биир күнэ ыччаттарга ананан, бэрт сонуннук ааста.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар түһэриитэ.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

четыре − 2 =