«Наука сайына-2021» бырайыак иккис сезона түмүктэннэ

Ааптар: 
Бөлөххө киир:

Саха сиригэр «Наука сайына-2021» онлайн сетевой бырайыак иккис сезона түмүктэннэ. Бырайыак өрөспүүбүлүкэ 22 улууһуттан уонна Дьокуускай куораттан 258 оҕону түмтэ диэн СӨ Үүнэр көлүөнэ тус сыаллаах пуондатын пресс-сулууспата иһитиннэрэр.

edersaas.ru

Бырайыак СӨ Үүнэр көлүөнэ тус сыаллаах пуондатын саҥа концепциятын чэрчитинэн 2021-23 сс. олоххо киллэриллэр. Иккис сезону үөрэнээччилэр, учууталлар, төрөппүттэр, научнай салайааччылар, консультаннар онлайн тэрээһининэн түмүктээтилэр.

Эҕэрдэ тылыгар пуонда генеральнай дириэктэрэ Владимир Егоров бырайыак сүдү суолталааҕын бэлиэтээтэ.

—Бастатан туран, билигин бары онлайн-үөрэҕирии саҥа кыахтарын олоххо киллэриинэн дьарыктаналлар, ыраахтан дьарыктаныы, ол иһигэр сетевой үөрэҕирии аан дойду үрдүнэн үөрэх биир сүрүн салаатыгар кубулуйда. Иккиһинэн, аан дойду тэтимнээхтик уларыйар, уустугурар, билгэлииргэ ыарахан буолан иһэр. Онон чинчийии эйгэтигэр бу курдук дьоҕурдаах дьон ордук наада буолан иһэллэр. Бу оҕолорго тулалыыр эйгэни үөрэтэргэ туһалаах буолуо. Уонна үсүһүнэн, бу төрөөбүт дойдуга бэриниилээх буолууга улахан суолталаах. Биһиги чинчийиилэрбит төрөөбүт сири-уоту, дойдуну билиигэ аналлаахтар. Маннык билииттэн төрөөбүт сиргэ таптал уонна ытыктабыл саҕаланар, – диэн эттэ Владимир Егоров.

«Наука сайына-2021 онлайн» бырайыак салайааччыта, Өлүөхүмэ оройуонун үөрэнээччилэрин айар уонна гуманитарнай үөрэхтээһиҥҥэ киинин директора Ольга Рожкова кэпсииринэн, сыллата кыттааччылар ахсааннара, географията, хайысхалара улаатан иһэр:

—Быйыл биһиги 258 үөрэнээччи, 85 учуутал уонна төрөппүт буолан Саха сирин 22 улууһуттан түмүстүбүт. Бу сезоҥҥа биһиэхэ дьоһун суолталаах икки хайысха – ирбэт тоҥу чинчийии уонна палеонтология эбилиннилэр. Ону таһынан энтомология, орнитология, ойуур экосистемата, эмтээх үүнээйилэр, цифровой картография уонна да атын хайысхаларга үлэлиибит, — диэн бэлиэтээтэ Ольга Юрьевна.

Пуонда бэрэстэбиитэллэрэ бэс ыйыгар ыытыллыбыт үөрэхтээһин туһунан кэпсээтилэр. Онно учуонай настаабынньыктар оҕолорго интэриэһинэй лиэксийэлэри, онлайн-дьарыктары уонна консультациялары ыыппыттар. Ол кэнниттэн бэйэ туспа үлэтин түһүмэҕэ ыытыллыбыт. Онно чинчийии, кэтээн көрүү, матырыйаалы хомуйууц уонна научнай арыйыылары оҥорууга дьарыктаммыттар.

Бу сыл түмүгүнэн 76 үлэ көмүскэммит, олортон 24-дэ өрөспүүбүлүкэтээҕи “Инникигэ хардыы” научнай-практическай кэмпириэнсийэҕэ кыттар таһымнааҕынан билиниллибиттэр.

«Саха сирэ» хаһыат, edersaas.ru

Хаартыска sakha.gov.ru

+1
0
+1
0
+1
0
+1
0
+1
0
+1
0
+1
0