Наука көмөтүнэн сайдыахпыт

Ааптар: 
Бөлөххө киир:

Бэс ыйын 11 күнүгэр, Арассыыйа күнүн көрсө, “Өлүөнэ очуостара” национальнай паарка” уонна “Арассыыйа Наукаларын академията” бииргэ үлэлээһиҥҥэ сөбүлэһиигэ илии баттаспыппыт. 

Бу биһиэхэ улахан ситиһиинэн буолар. Уонна пааркабыт науката сайдыытыгар эрэ буолбакка, бүттүүн өрөспүүбүлүкэбитигэр бэлиэ суолталаах. Тоҕо диэтэххэ, айылҕа ураты харыстанар сирдэриттэн биир бастакынан маннык кыахтанныбыт, үрдүк ситиһиилэннибит.

Бу сөбүлэһиини түһэрсиигэ Арассыыйа Наукаларын академиятын А.А.Борисяк аатынан Палеонтологическай институту кытта өр сыллаах үлэбит төһүү күүс буолла. Биллэрин курдук, бу үлэ ааспыт үйэ 80-с сылларыттан саҕаламмыта уонна паарка сайдыытын устуоруйатыгар бэлиэ суолу хаалларда. Сөбүлэһии көмөтүнэн палеонтологияҕа научнай иһитиннэриини ылыахпыт, атын да наукаларга эмиэ, педагогикаттан саҕалаан геологияҕа уонна археологияҕа тиийэ. Биһиги пааркабыт уонна Арассыыйа Наукаларын академията бииргэ үлэлээһиннэрэ үтүө түмүктэрдээх буолуоҕа, бырайыактар оҥоһуллуохтара уонна уопсай сайдыыбытыгар саҥа саҕахтар арыллыахтара.

Биллэн турар, маны ситиһэрбитигэр биологическай наука дуоктара, профессор, РНА чилиэн-кэрэспэдьиэнэ Соломонов Никита Гаврилович, геолого-минералогическай наука дуоктара, профессор, РНА академига, Кембрийгэ норуоттар икки ардыларынааҕы хамыыһыйаҕа өр сыл бэрэссэдээтэллээбит Розанов Алексей Юрьевич, биологическай наука дуоктара, академик, РНА Президиумун чилиэнэ М.К.Аммосов аатынан ХИФУ Өлүөнэ аллараа өттүгэр ыыппыт  эспэдииссийэлэригэр кыттыбыт Рожнов Сергей Владимирович уонна геолого-минералогическай наукалар хандьыдааттара Иванцов Андрей Юрьевич, Скорлотова Надежда Анатольевна көмөлөрө олус сөҕүмэр. “Өлүөнэ очуостара” национальнай паарка” тэрилтэ аатыттан кинилэргэ таһаарыылаах үлэлэрин, уопсай дьыалаҕа ис сүрэхтэриттэн кыһамньыларын иһин дириҥ махталбын тириэрдэбин.

Аркадий Семенов. “Өлүөнэ очуостара” национальнай паарка ФГБУ дириэктэрэ.

Бэлэмнээтэ Женни СТРЮКОВА, «Саха сирэ» хаһыат 

Хаартыска: национальнай паарка архыыбыттан

+1
0
+1
0
+1
0
+1
0
+1
0
+1
0
+1
0