Саха сиригэр «NAUKA 0+» диэн Наука VII бэстибээлэ арылынна.
edersaas.ru
Тэрээһин Дьокуускай куоракка алтынньы 8-20 күннэригэр ыытыллыаҕа. Бэстибээл ыччат бастакы научнай кэмпириэнсийэтиттэн саҕаланна. Арассыыйа наукаларын академиятын Саха сиринээҕи научнай киинин 70 сылыгар анаммыт үбүлүөйдээх тэрээһин чэрчитинэн ыытыллар «Арассыыйа наукаларын академиятын Сибиирдээҕи отделениетын Саха сиринээҕи научнай киинэ» диэн ыччат бастакы кэмпириэнсийэтигэр Арассыыйа наукаларын академиятын Саха сиринээҕи икки тирэх оскуолата — Дьокуускайдааҕы лиссиэй уонна Владимир Ларионов аатынан физика-тиэхиньичэскэй лиссиэй уонна эдэр аспираннар, устудьуоннар кыттыыны ыллылар.
— Быйыл СӨ Үөрэҕин уонна наукатын министиэристибэтэ Азиятааҕы-Тиихэй акыйаан эригийиэнин эдэр учуонайдарын кэмпириэнсийэлэрин уонна Саха сиригэр ыытыллар 2-с норуоттар икки ардыларынааҕы «Эдэр чинчийээччилэр оскуолалара» диэн бэрт улахан суолталаах тэрээһини ыытар. Онно 11 араас дойду бэрэстэбиитэллэрэ кыттыыны ылыахтара.
Арассыыйа наукаларын академиятын Сибиирдээҕи отделениетын Саха сиринээҕи научнай киинин салалтата «Юные якутяне» диэн өрөспүүбүлүкэтээҕи ресурснай киини уонна наукаҕа тирэх оскуолаларынан буолбут Дьокуускайдааҕы лиссиэй уонна Владимир Ларионов аатынан физика-тиэхиньичэскэй лиссиэй дириэктэрдэрин кытта сөбүлэҥ түһэристэ.
Суолталаах докумуоҥҥа олоҕуран, оҕону эбии үөрэхтээһин чэрчитинэн саха учуонайдара үөрэнээччилэри научнай чинчийии салаатыгар сыһыаран, бииргэ үлэлиэхтэрэ.
Бу иннинэ ыччакка аналлаах наука бэстибээлин Наука аччыгый академиятын уонна Саха сирин наукаларын академиятын күүстэринэн ыытыллара.
Наука VII бэстибээлэ Сомоҕолоһуу сылыгар анаммыт өрөспүүбүлүкэтээҕи суолталаах тэрээһиннэртэн биирдэстэринэн буолар.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.