Бу күннэргэ Ньурба улууһун Чуукаарыттан төрүттээх доруобуйа харыстабылын эйгэтигэр 303 сыл уопсай ыстаастаах Филипповтар удьуор дьиэ кэргэҥҥэ үөрүүлээх күн тосхойдо. Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ, норуот дьокутаата Владимир Чичигинаров уонна СӨ профсоюһун федерациятын бэрэссэдээтэлэ Николай Дегтярев династия ытык кырдьаҕаһыгар, доруобуйа харыстабылын бэтэрээнэ, 82 саастаах Мария Иннокентьевна Ивановаҕа — Наттаайаҕа «СӨ Бастыҥ үлэлээх династия» диэн анал бэлиэни туттардылар уонна Филипповтар дьиэ кэргэни «СӨ Бастыҥ үлэлээх династия» Бочуот кинигэтигэр киллэрэр туһунан үөрүүлээх сонуну иһитиннэрдилэр.
Мария Иннокентьевна 1962 сыллаахха Ньурбаҕа трахоманы эмтиир балыыһаҕа сиэстэрэнэн, онтон Чуукаарга учаастактааҕы балыыһаҕа 10 сыл поварынан үлэлээбит. Эдэр сааһыгар, улахана 18-тааҕар, кырата аҕыйах ыйдааҕар, барыта 7 оҕолоох огдообо хаалбыта. Ол күнтэн оҕолорун туһугар сыратын-сылбатын харыстаабакка үлэлээн, барыларын үөрэхтээн, идэлээх үлэһит дьон гына улаатыннаран, иитэн таһаарбыта. Аҕата Иннокентий Кириллович Иванов – Ороһу Оҕонньор норуот эмчитэ. Уҥуох тостуутугар табыгастаах ньымалары туттар, отоһут уонна сүһүөх ыарыыларын илбийэр буолан, киэҥник сураҕырбыт. Итини сэргэ, дьону хаанныыр, түөннүүр, ардыгар дьахтар да төрөтөр сатабыллаах эмчит эбит.
Мария Иннокентьевна уола Семен Викторович Филиппов эһэтин удьуордаан эмчит идэтин талан стоматолог-быраас, инньэнэн эмтиир, мэдэссиинискэй наука хандьыдаата, үлэтин ыстааһа – 36 сыл. Кини кэргэнэ, мэдиссиинискэй наука доктора Роза Дмитриевна үлэтин ыстааһа – 39 сыл. Оттон кыргыттар убайдарын батыһан утуу-субуу мэдиссиинэ суолун тутуспуттара. Ол курдук, Галина Викторовна Чукаар учаастактааҕы балыыһатыгар 39-с сылын санитаркалыыр, Розалия Викторовна 34-с сылын сиэстэрэнэн, Раиса Викторовна 33-с сылын невролог- бырааһынан, Светлана Викторовна 26-с сылын Москва куорат клиникатыгар гинеколог-бырааһынан үлэлииллэр. Дьэ, итини барытын этэн туран, Ил Түмэн дьокутаата Владимир Чичигинаров барыларыгар Саха сиригэр бастыҥ үлэлээх династия буолалларын туоһулуур Бочуотунай грамоталары туттарда.
Билигин Филипповтар династия сыдьааннарыгар 18 киһи аата ааттанар. Олор истэригэр СӨ уонна РФ Доруобуйа харыстабылын туйгуннара бааллар, династия саамай кыра киһитэ, ол эбэтэр бэһис көлүөнэни төрүттээччи Мария Иннокентьевна хос сиэнэ буолар. Удьуор Филипповтарга – Наттаайа кылааннарыгар өссө да таһаарыылаах үлэни баҕарыаҕыҥ!
Алексей Степанов. Дьокуускай.