Табаары, өҥөнү атыылаһыы 2019 сыллаах национальнай рейтинин түмүгүн таһаарыыга Саха өрөспүүбүлүкэтэ 5887 баалы ылан, сэттис миэстэҕэ таҕыста. Онон дойду үрдүнэн инники күөҥҥэ киирэн, үрдүк наҕарааданы ылла. Ол туһунан СӨ Судаарыстыбаннай атыылаһыыга үлэлэһэр киинигэр иһитиннэрдилэр.
edersaas.ru
№ 44-дээх федеральнай сокуонунан хантараах ситимин сайыннарарга бу Саха сиригэр дьоһун көрдөрүү. Бу сылтан СӨ Судаарыстыбаннай атыылаһыыга үлэлэһэр киинигэр эбии боломуочуйа бэрилиннэ. Ол курдук электроннай ньыманан туох этии баарын ырытан көрөн баран, Киин бэдирээтчиттэри, өҥөнү толорооччулары, табаары аҕалааччылары талыан сөп.
Атыылаһыыны биир сиргэ кииннээһин хоруупсуйаны утары охсуһарга, ким хантан тугу атыылаһарын кистээбэккэ аһаҕастык тутарга көмөлөһөр.
Сыл ахсын атыылаһыыга кыттааччылар, ол иһигэр дьоҕус урбаан бэрэстэбиитэллэрэ элбээн иһэллэр. Атыылаһыыга сакаасчыттар идэтийиилэрин үрдэтэргэ сыл ахсын «Саха сирин атыылаһыыта» диэн 400 үлэһит кыттыылаах өрөспүүбүлүкэтээҕи кэмпириэнсийэ ыытыллар.
СӨ Судаарыстыбаннай атыылаһыыга киинэ 543 судаарыстыбаннай уонна муниципальнай сакаасчыттарга боломуочуйалаах тэрилтэ буолар. 2019 сылга өрөспүүбүлүкэ судаарыстыбаннай наадатыгар 46,9 миллиард солкуобайга табаары, үлэни, өҥөнү атыылаһыы былааннаммыт. Оттон боломуочуйалаах тэрилтэ нөҥүө атыылаһыы 84 % ол эбэтэр 39,5 миллиард солкуобай ааһыаҕа.
Бу сыл саҕаланыаҕыттан СӨ Судаарыстыбаннай атыылаһыыга киинигэр табаары, үлэни атыылаһарга 25 000 тахса сайаапка киирбит. Уопсайа 50 миллиартан тахса солкуобайга 18 000 иһитиннэрии оҥоһуллубут. Ити ыйыллыбыт тэрилтэ атыылаһыы түмүгүнэн хантараах бастакы сыанатыттан 2,3 мөлүйүөн солкуобай бүддьүөт харчытын кэмчилиири ситиспит.
Табаары, өҥөнү атыылаһарга өрөспүүбүлүкэ Уһук Илин инники күөҥҥэ сылдьар. Бу хайысхаҕа оҥоһуллар Национальнай рейтинг экэниэмикэ, сакаас ырыынагын туругун, онно төһө күрэстэһии баарын, атыы-эргиэн төһө аһаҕастык барарын сыаналыырга көмөлөһөр. Тустаах рейтинг судаарыстыбаннай уонна корпоративнай сакаас хайдах оҥоһулларын, сокуон төһө тутуһулларын, сакаас ырыынагар туох итэҕэс, саҥа сүүрээх баарын үөрэтэргэ туһалыыр.
«Саха сирэ», edersaas.ru