Госдуумаҕа национальнай тыллары булгуччу үөрэтиигэ туспа бөлөх тэриллиэҕэ
Национальнай өрөспүүбүлүкэлэр төрүт тылларын баҕа өттүнэн үөрэтии сокуон барыла быйыл киирбитин, үгүстэр ыарыылаахтык ылыммыттара.
“РФ Үөрэҕин туһунан” сокуоҥҥа национальнай тыллары баҕа өттүнэн үөрэтии туһунан уларытыылары киллэрии барыла ситэри оҥоһуллуоҕа итиэннэ өрөспүүбүлүкэлэргэ ылыныллыан сөптөөх буолуо диэн Госдуума үөрэххэ уонна наукаҕа кэмитиэтин бэрэссэдээтэлин солбуйааччы Олег Смолин РИА Новости иһитиннэрбит.
Санатан эттэххэ, муус устарга Госдуума дьокутаатын алта киһилээх бөлөҕө Арассыыйа өрөспүүбүлүкэлэрин судаарыстыбаннай тылларын баҕа өттүнэн, оттон төрөөбүт тылларын үөрэнээччилэр уонна төрөппүттэр төһө улаханнык наадыйалларынан көрөн үөрэтэр сокуон барылын киллэрбиттэрэ. Итини бэйэлэрэ судаарыстыбаннай тыллаах национальнай өрөспүүбүлүкэлэр ыарыылаахтык ылыммыттара. Татарстантан саҕалаан, үгүс өрөспүүбүлүкэлэр киэҥ кэпсэтиини таһаардылар, үгүстэр сокуон тустаах уларытыыларын барылын утаралларын эттилэр.
Сокуон ити барылыгар этиилэри, санаалары Госдуумаҕа от ыйыгар диэри ылаллар үһү диэн иһиллибитэ. Ыам ыйын бүтүүтэ “Биир ньыгыл Арассыыйа” баартыйа салайааччытын бастакы солбуйааччы Адальби Шхагошев Госдуума иһинэн сокуон ити барылын ситэрэн оҥорууга оробуочай бөлөх тэриллиэҕин туһунан иһитиннэрбитэ.
Бу күннэргэ Олег Смолин: “Сокуон барыла национальнай өрөспүүбүлүкэлэргэ ордук табыгастаах буолуо. Ону кытта төрөөбүт тыллара буолбатах дьоҥҥо (нетитульных национальностей республик) күүстэринэн үөрэппэт туһунан идея оннунан хаалыаҕа”, — диэн эппит.
Людмила ПОПОВА, “Саха сирэ” хаһыат, edersaas.ru
Хаартыска интэриниэттэн.