Арассыыйа национальнай рейтинын экспертэрэ губернатордар кулун тутардааҕы уонна муус устардааҕы үлэлэрин кэтээн көрүүлэринэн, СӨ Ил Дархана Айсен Николаев ахсыс миэстэҕэ таҕыста.
Политологтар Саха Өрөспүүбүлүкэтин аҕа баһылыга эрэгийиэннэртэн бастакынан экэниэмикэ туруктаах буолуутугар туһааннаах миэрэлэри ылыммытын, социальнай эйгэҕэ, орто, дьоҕус бизнеһи өйүүр суһал дьаһаллары таһаарбытын, аһы-үөлү, нэһилиэнньэ бастакы уочарат наадыйар табаарын кэмигэр уонна саппаастаахтык таһыыга үлэни ыыппытын ордук чорботон бэлиэтииллэр.
Ону таһынан дьаҥы-дьаһаҕы утары киирбит миэрэлэри устан, уустук кэмҥэ орто, дьоҕус бизнеһы өйөөбүтүн уонна, биир өттүнэн, нэһилиэнньэ доруобуйатын көрүнүүтүгэр, чөл туруктаах буолуутугар улахан үлэ барбытын, эминэн-томунан хааччыллыы эрдэттэн ыытыллыбытын этэллэр.
Саха сирэ төһө да соҕуруу дойдулартан ыраах олордор, Донецкай уонна Луганскай Народнай Өрөспүүбүлүкэлэр олохтоохторугар көмө-тирэх буолалларын эмиэ ахтан аһардылар. “Саха сиригэр кэлбит дьон ахсааннара аҕыйаҕын иһин, өрөспүүбүлүкэ салалтата кинилэргэ улахан болҕомтотун уурар”, – диэн этэллэр экспертэр.
Национальнай рейтинг көрүүтүнэн, атын эрэгийиэннэрдээҕэр Саха сиригэр орто, дьоҕус бизнеһы өйөөһүҥҥэ сөптөөх уонна кэмигэр ыытыллыбыт көмө барбыт. Биир сүрүн көмөнөн предпринимателлэргэ нолуокка чэпчэтиилэр көрүллүбүттэрэ буолар. Манна даҕатан эттэххэ, бу чэпчэтиилэри барыларын холбоотоххо 2,5 млрд солкуобай суумалаах көмө тахсан кэлэр. Экэниэмикэ туруктаах буолуутугар өрөспүүбүлүкэҕэ барыта 15 млрд солкуобайдаах анал миэрэлэр ылыллан тураллар. Ону таһынан аналитиктар айти-технологияны сайыннарыыга күүстээх үлэ барарын этэллэр. Уһук Илиҥҥэ билигин Саха сирэ инники күөҥҥэ сылдьар.
Экспертэр Саха сиригэр Уһук Илин эрэгийиэннэргэ РФ бэрэсидьиэнин боломуочуйалаах бэрэстэбиитэлэ Юрий Трутнев кэлэн, өрөспүүбүлүкэ үлэтин-хамнаһын, хотугу улуустарга таһаҕаһы таһыыны көрөн-истэн барбытын, үчүгэй сыанабылы биэрбитин бэлиэтииллэр. Манна сыһыаран Айсен Николаев РФ үбүн миниистирэ Антон Силуановы кытары көрсүбүтүн, Ил Дархан өрөспүүбүлүкэ социальнай-экономическай сайдыытыгар кылаатын иһин “Доҕордоһуу” уордьанынан РФ бэрэсидьиэнэ Владимир Путинтан наҕараадаламмытын этэллэр.
Национальнай рейтинг: “Айсен Николаев аан дойду үрдүнэн буола турар балаһыанньаны сөпкө өйдөөн, экэниэмикэтин сайыннарыыга, манна саҥа ньымалары көрдөөн, чуолаан тас дойдуттан киириини кыччатан, бэйэ оҥорон таһаарыытыгар, болҕомтотун уурда”, – диэн түмүк таһаарда.
Аграфена КУЗЬМИНА