Рязань уобалаһыгар эрэгийиэннэр икки ардыларынааҕы үгэс буолбут «Читающий мир» национальнай кинигэлэр бэстибээллэрэ түмүктэннэ.
Быйылгы тэрээһин үс бэлиэ даатаҕа: Рязань губерниятын 240, М.Горькай аатынан уобаластааҕы бибилэтиэкэ тэриллибитэ 160, Максим Горькай төрөөбүтэ 150 сылларыгар ананна.
Бэстибээлгэ 29 эрэгийиэнтэн 93 издательство кыттыыны ылла. Тэрээһин үөрүүлээх арыллыытыгар, бэстибээл чэрчитинэн ыытыллыбыт «Сыл кинигэтэ» куонкурус түмүгүн билиһиннэрдилэр. Күөн күрэскэ 22 эрэгийиэнтэн 58 издательство кыттыбыт. 157 үлэ киллэриллибитин Ridero электроннай издательскай тиһиги төрүттээччи, эрэдээктэр, литэрэтиирэ диэйэтэлэ, телебиэриилэри ыытааччы Александр Гаврилов бэрэссэдээтэллээх дьүүллүүр сүбэ көрбүт-истибит.
Түмүккэ «Бичик» НКК бэчээттээбит икки үлэтэ кыайыылааҕынан таҕыста. Ол курдук, «Лучшая книга о России» номинацияҕа «Материальная и духовная культура народов Якутии в музеях мира (17 – начало 20 вв.) Кн.1 Сибирская коллекция в музеях США» үлэтэ үрдүк сыанабылы ылан үөрүү-көтүү өрөгөйө буолла.
«Лучшая книга для родителей» (2018-2027 сс. –оҕо-аймах уон сыла) номинацияҕа «Ааҕар кинигэ (Книга для чтения)» ааттанна. «За сохранение и развитие уникального наследия предков» номинацияҕа А.С.Федоров «Народные игры и забавы Саха» уонна «Ураал Баатыр-Урал Батыр» (Оҥорооччу А.Н. Жирков), «За понимание мира детства» — Г.И Данилов «Веселые стихи для детей» кинигэлэрэ бастыҥынан ааттанан анал дипломнар туттарылыннылар.
«Бичик» НКК генеральнай дириэктэрэ Август Егоров, Арассыыйа далааһыннаах түһүлгэтин күрэһэр кыайыы тэрилтэ ааптардары кытары ыкса уонна тиһиктээх үлэтин түмүгэ буоларын бэлиэтээтэ, барыларыгар махталын биллэрдэ.
Роза Николаева, «Бичик» НКК пресс-сулууспата
+1
+1
+1
+1
+1
+1
+1