Национальнай художественнай мусуой сарсыҥҥыттан үлэтин саҕалыаҕа

 Хааччахтааһыны сымнатыы иккис түһүмэҕэ саҕаламмытынан, от ыйын 8 күнүттэн, СӨ Национальнай художественнай мусуойа үлэтин саҕалыыр.

Маҥнайгы кэмҥэ туспа эрэсиими тутуһуу ирдэниэҕэ. Ол курдук, мусуой иһигэр мааскалаах, бэрчээккилээх эрэ киирэр көҥүллэниэ. Бөлөҕүнэн экскурсия 5 киһиттэн элбэҕэ суох буолуоҕа. Маны сэргэ, мусуой үлэһиттэрэ төлөбүрү хантаага суох, баан каартатынан оҥорорго көрдөһөллөр. Иһирдьэ, аан таһыгар, хас биирдии киирээччи кыраадыһа мээрэйдэниэ. Оттон тахсыы кэтэх аанынан буолуоҕа.

Мусуой күнүс 12.00 чаастан киэһээ 20.00 чааска диэри үлэлиир. Манна сарсыҥҥыттан, от ыйын 8 күнүттэн, «Линия любви» быыстапка көрдөрүллүө. Сүрүн экспозиция от ыйын 16 күнүттэн арыллыа. Ити күн Михаил Лукин “Пульс 60-х” быыстапкатын, оттон Хабарова 27 аадырыска Афанасий Осипов хартыыналарын көрүөххүт.