Национальнай бырайыактарынан ыытыллар тутуулар — ураты хонтуруолга
Национальнай бырайыактары олоххо киллэриигэ үлэлиир оперативнай ыстаап мунньаҕар Ил Дархан Айсен Николаев тутулла турар өрөспүүбүлүкэтээҕи сүрүн тутуулар хаамыыларын дьүүллэстэ.
Ил Дархан уонна СӨ бырабыыталыстыбатын пресс-сулууспата иһитиннэрбитинэн, суолталаах эбийиэктэр ортолоругар «Доруобуйа харыстабыла» национальнай бырайыак чэрчитинэн тутулла турар Кардиология киинэ буолар.
Маны таһынан, «Олорор дьиэ уонна куорат эйгэтэ” национальнай бырайыак чэрчитинэн ыытыллар “2019-2025 сылларга хаарбах туруктаах дьиэлэртэн дьону көһөрүү” бырагыраама эбийиэктэрин тутууларын дьүүллэһии буолла. Бу боппуруоска өрөспүүбүлүкэ салалтата улуустар баһылыктара уонна тутууну ыытар тэрилтэри иһиттэ. Эбийиэктэри тутуу улуус аайы араастаһара билиннэ. Былаантан хаалбат инниттэн Ил Дархан миэстэтигэр эбии оробуочайдар биригээдэлэрин наймылаһарга соруйда.
Дьокуускайга Кардиология диспансерын II уочарата – 150 куойкалаах Кардиососудистай киин 2021 сыл ахсынньытыгар аһыллыахтаах.
“Куттала суох хаачыстыбалаах суол” национальнай бырайыак чэрчитинэн Мерзлотнаай уулуссаҕа тротуар уонна массыына тохтуур сирэ оҥоһуллуоҕа.
Министиэристибэлэргэ, биэдэмистибэлэргэ, тутуу тэрилтэлэригэр, улуустар баһылыктарыгар туһаайан, Ил Дархан Айсен Николаев олоххо киирэн эрэр эбийиэктэр хаачыстыбаларын хонтуруоллууру ирдээтэ. Оперативнай ыстаап тэриллибит төрүөтэ – өрөспүүбүлүкэтээҕи уонна федеральнай бүддьүөттэргэ үбүлээһин көрүллүүтүгэр федеральнай, эригийиэннээҕи уонна муниципальнай былаас уорганнара тутааччылары кытта бииргэ үлэлээһиннэрин сүрүннээһин.
Елена ПОТОЦКАЯ, “Саха сирэ” хаһыат, edersaas.ru
Хаартыска — Андрей Сорокин (СИА)