Ыам ыйын 18 күнүгэр Саха сирин Ил Дархана Айсен Николаев национальнай бырайыактары олоххо киллэрии туһунан мунньах ыытта.
edersaas.ru
Бүгүҥҥү чахчыларынан, национальнай бырайыактары олоххо киллэриигэ 2021 сылга 45,4 млрд солкуобай былааннаммыт эбит. Олортон 31,9 млрд федеральнай бүддьүөттэн киириэхтээх, Саха Өрөспүүбүлүкэтин бүддьүөтүттэн 7,2 млрд, олохтоох бүддьүөттэртэн 628,8 мөл. уонна бүддьүөтү таһынан үбүлээһин 5,6 млрд солкуобайга тэҥнэһэр эбит.
Ил Дархан национальнай бырайыактары анаммыт болдьохторугар толоруу Арассыыйа бэрэсидьиэнэ Владимир Путин сорудаҕа буоларын тоһоҕолоон эттэ. Эрэгийиэн баһылыга бырайыактар араас тэтиминэн баран иһэллэрин туһунан эттэ, сорох бырайыактар анаммыт болдьохторуттан хаалан иһэллэрин ыйда. Былаантан хаалыылаах үлэлэри түргэтэтэр былаан оҥоруу бастакы уочараттаах тэрээһин буолуохтааҕын туһунан эттэ.
Мунньахха кэлбит салайааччылар бу түгэннэри ситэрэргэ анаммыт чинчийиилэрин түмүгүн көрдөрдүлэр. “Олорор дьиэ уонна куорат эйгэтэ” национальнай бырайыак туһунан Саха сирин бастакы вице-премьера Кирилл Бычков дакылааттаата. Кини этэринэн, улахан болҕомтону саҥа тутуллар дьиэлэр ахсааннарын учуоттуур былаан ирдиир. Тутуу тэтимин үрдэтиэх тустаахпыт, ол иһигэр ИЖС тутуу кээмэйэ элбиирин суотугар, диэн буолла. Хаарбах дьиэттэн көһөрүү былааннаммыт тэтиминэн баран иһэрин бэлиэтээн эттэ.
Айсен Сергеевич тутуу эйгэтигэр экэниэмикэ билиҥҥи туругуттан сылтаан бытаарааһын баарын туһунан эттэ. Ил Дархан бу хаалыыны суһаллык суох оҥорорго аналлаах былаан оҥорорго бырабыыталыстыбаҕа сорудах биэрдэ.
Вице-премьер Ольга Балабкина “Доруобуйа харыстабыла” национальнай бырайыак чэрчитинэн суруллубут санитарнай авиация былааннаммыт көрдөрүүлэрэ уустугар болҕомтону тарта. Саха сирин усулуобуйатыгар санавиация рейстэрэ атын эрэгийиэннэртэн ордук элбэх үбү эрэйэрин ыйда, эбии үбүлээһин эрэйиллэрин эттэ. Айсен Николаев бу кыһалҕаны быһаарар сөптөөх быһаарыыны көрдүүргэ сорудахтаата. Ольга Балабкина “Доруобуйа харыстабыла” уонна “Демография” бырайыактар атын көрдөрүүлэрэ сөптөөх болдьоххо толоруллуохтара диэн эрэннэрдэ.
“Куттала суох уонна хаачыстыбалаах массыына суоллара” национальнай бырайыак чэрчитинэн 2021 сылга ордук улахан үлэлэр Дьокуускай куоракка былааннаммыттар. Ил Дархан Тырааныспар миниистиригэр тутуу сезона кылгаһын учуоттаан, үлэ тэтимин күн аайы хонтуруоллуурга ыҥырда.
“Үөрэҕирии” национальнай бырайыак иһинэн Жатай уонна Бүлүү техникумнарын өрөмүөнэ туспа хонтуруолга тураллара этилиннэ. Аҕа баһылык бу тутууга муниципальнай үбүлээһин кыттыытын эрдэттэн былааҥҥа киллэрэр көдьүүстээҕин туһунан эттэ.
Мунньах түмүгэр Айсен Николаев национальнай бырайыактары баар уустуктары аахсыбакка, болдьоммут кэмигэр толору түмүктэниэхтээхтэрин туһунан тоһоҕолоон эттэ. Бырайыак куратордарыгар хонтуруолу ончу сымнаппкка ыыталларыгар ыйда.
«Саха сирэ» хаһыат, edersaas.ru
Хаартыска sakha.gov.ru