Национальнай бырайыактары олоххо киллэрии түмүктэрэ таһаарылыннылар

Бөлөххө киир:

СӨ Ил Дархана Айсен Николаев 2021 сылга национальнай бырайыактары олоххо киллэрии түмүктэрин таһаарда.

edersaas.ru

«Национальнай бырайыактары олоххо киллэрии боппуруоһа, биллэн турар, улахан суолталаах. Ааспыт сыл түмүктэринэн үбү тус сыаллаах туһаныы көрдөрүүлэрин ситиһии ортотук бэлиэтэннэ. 2022 сылга толорооччулар хантараактары түһэрсии куонкуруһун биллэрии үлэтин түргэтэтиэхтэрин наада», -– диэтэ Айсен Николаев.
«Доруобуйа харыстабылын бастакы сүһүөх звенотун модернизациялааһын» бырагыраама 2022 сылтан «Доруобуйа харыстабыла» национальнай бырайыак састаабыгар киллэрилиннэ. Саха сиригэр эрэгийиэннээҕи бырагырааманы олоххо киллэрии 2021 сылтан саҕаламмыта.
2021 сылга өрөспүүбүлүкэҕэ 123 көрдөрүүгэ тус сыаллаах 44 эрэгийиэннээҕи бырайыак олоххо киирбититтэн 106 көрдөрүүгэ былаан ситиһилиннэ. «Куттала суох уонна хаачыстыбалаах суоллар», «Култуура», «Дьоҕус уонна орто предпринимательство», «Үөрэхтээһин», «Үлэ оҥоһуллуута» уонна «Сыыппаралаах экэниэмикэ» курдук 6 бырайыак 100 бырыһыан толорулунна. «Доруобуйа харыстабыла» национальнай бырайыакка 8 көрдөрүү ситиһиллибэтэҕэ пандемияны кытары сибээстээх.
«Ойууру харыстааһын» эрэгийиэннээҕи бырайыакка биир көрдөрүү былырыын баһаар уустук усулуобуйатыттан сылтаан толоруллубата.
Ааспыт сыл түмүктэринэн национальнай бырайыактар сорох көрдөрүүлэрин түмүктэрэ Арассыыйа орто көрдөрүүтүттэн үрдүктэр.
«Олорор дьиэ уонна куорат эйгэтэ» национальнай бырайыак быһыытынан 17 эбийиэк үлэҕэ киллэрилиннэ, 570 тыһ. кв. м. иэннээх дьиэ тутулунна.
Суол үлэтин кээмэйэ, ааспыт сыллары кытары тэҥнээтэххэ, биллэ улаатта. Ааспыт сылга «Куттала суох уонна хаачыстыбалаах суоллар» национальнай бырайыак чэрчитинэн 180 килэмиэтирдээх суол туруга көннөрүлүннэ. Бу -– өрөспүүбүлүкэ национальнай бырайыагы олоххо киллэрии устуоруйатыгар муҥутуур ситиһии.
Өссө биир дьоһуннаах ситиһии экология туругун, тулалыыр эйгэ хаачыстыбатын тупсарыыга бэлиэтэннэ. «Олорор дьиэ уонна куорат эйгэтэ» национальнай бырайыакка Хаҥалас улууһун Покровскай сэлиэнньэтигэр ууну ыраастыыр тэриллэри тутуу, ону сэргэ Өлүөхүмэ куоратыгар уунан хааччыйыы систиэмэтин саҥардыы иккис түһүмэҕэ түмүктэннилэр.

Надежда ЕГОРОВА, «Саха сирэ» хаһыат, edersaas.ru

Андрей СОРОКИН түһэриитэ

+1
0
+1
0
+1
0
+1
0
+1
0
+1
0
+1
0