Бырабыыталыстыба бэрэссэдээтэлэ Андрей Тарасенко өрөспүүбүлүкэҕэ национальнай бырайыактары олоххо киллэриигэ куйаар ситиминэн мунньахтаата.
Бырабыыталыстыба чилиэннэрэ тутуу матырыйааллара ыараабыттарынан сибээстээн, федеральнай уорганнар ситэриилээх былаастарын кытта сүбэлэһэн баран, эбийиэктэри олоххо киллэрии болдьоҕун көһөрөн биэрбиттэрин, хапытаалынай тутууга эбии үбүлээһини көрүү боппуруостарын быһаарбыттарын туһунан иһитиннэрдилэр. Ол курдук, «Куттала суох хаачыстыбалаах суоллар», «Үөрэхтээһин», «Култуура», «2020-2025 сылларга тыа сирин кэлимник сайыннарыы» СӨ судаарыстыбаннай бырагыраамата курдук бырайыактар тутуу матырыйаала ыараабытынан, сорох импортнай табаары аҕалыы уустугурбутунан үбүлээһини оҥорууга дуогабар докумуоннарыгар кэккэ боппуруостар дьүүллэһиигэ турдулар.
«Ыраас уу» эрэгийиэннээҕи бырайыак «Олорор дьиэ уонна куорат эйгэтэ» национальнай бырайыак чэрчитинэн ыытыллар. 2022 сылга уунан хааччыйар үс эбийиэк олоххо киириэхтээх. Онтон Сунтаар сэлиэнньэтигэр уунан хааччыйар тиһиги тутууга 39, 085 мөл. солк эбии федеральнай үп көрүлүннэ.
«Үөрэхтээһин» национальнай бырайыак чэрчитинэн үс эбийиэги ситэриигэ 260, 62 мөл. солк. көрүлүннэ. «Култуура» национальнай бырайыак чэрчитинэн Бүлүү улууһун Тааһаҕар нэһилиэгэр култуурунай киини тутууга эбии 16, 687 мөл. солк. көрүлүннэ.
СӨ Бырабыыталыстыбатын Бэрэссэдээтэлэ Андрей Тарасенко салайааччылар болҕомтолорун 2022 сыллааҕы бырайыактарга эбии федеральнай үбүлээһини көрүүгэ салгыы үлэлииллэригэр туһаайда.
Елена ПОТОЦКАЯ «Саха сирэ» хаһыат.