Национальнай бырайыактары үлэлэтэргэ хоруупсуйа суох буолуохтаах
Быраап бэрээдэгин хааччыйыы туһунан сүрүннүүр мунньах буолан ааста. Онно Ил Дархан хоруупсуйанан буруйу оҥорууну төрдүттэн суох гыныллыахтаах, ону сэрэтэр үлэни күүһүрдүөххэ диэн эттэ.
— Национальнай бырайыактарга федеральнай бүддьүөттэн элбэх үп көрүллэр. Бу ааһан эрэр сылга 30 миллиард солкуобай көрүллүбүтэ. Владимир Путин национальнай бырайыактар түмүктээх, дьон олоҕун таһымын үрдэтэргэ туһуламмыт буолуохтаахтар диэн этэр. Онон бырайыактары олоххо киллэриигэ туох да кэһии, буруйу оҥоруу тахсыа суохтаах. Үп ороскуоттанарын, болдьоҕу тутуһууну хонтуруоллуурбутун күүһүрдүөхтээхпит. Бу биһиги үлэбит биир сүрүн хайысхата, — диэн Айсен Николаев эттэ.
Урут национальнай бырайыактары олоххо киллэриигэ оҥоһуллубатах үлэлэри төлүүргэ кэһиилэр бааллара. Билигин сакаасчыттар уонна бэдэрээтчиттэр эбээһинэстэрин үтүө суобастаахтык толорорго кыһаллаллар. Ол эрээри быйыл Урбааны сайыннарыы пуондатыгар анал бөлөҕү буллулар, кинилэр үбү-харчыны бэйэлэрэ хонтуруоллуур тэрилтэлэрин счетугар ыыталлар эбит. Айсен Николаев бу түгэни бырабыыталыстыба өттүттэн хонтуруол мөлтөөбүтүнэн аахта. Онон быраабы көмүскүүр уонна хонтуруоллуур уорганнары кытары бииргэ үлэлэһэри күүһүрдэргэ, кэҥэтэргэ сорудахтаата диэн Ил Дархан, бырабыыталыстыба дьаһалтатын пресс-сулууспата иһитиннэрэр.
Ангелина Васильева, “Саха сирэ” хаһыат, edersaas.ru
Хаартыска: Андрей Сорокин.