Ил Дархан Айсен Николаев СӨ бырабыыталыстыбатын кытары мунньаҕар национальнай бырайыактарга сүрүн болҕомтону ууруохха наадатын бэлиэтээтэ.
Санатан эттэххэ, РФ бырабыыталыстыбата национальнай бырайыактар олоххо киириилэрин кэтээн көрөргө туһуламмыт үлэ хайысхатын уларытан турар. Билигин аны информационнай систиэмэнэн бырайыактар нэһилиэнньэҕэ төһө туһаны аҕалбыттарынан сыаналаналлар.
— Бу систиэмэнэн бырайыакка көрүллүбүт үбүлээһин төһө көдьүүстээхтик туһаныллыбытын таһынан, аны туһааннаах бырайыак нэһилиэнньэҕэ төһө туһаны аҕалбыта көстөр буолуоҕа. Эрдэ систиэмэ нөҥүө куонкурус биллэриллибитэ, манна төһө суума көрүллүбүтэ, ол үбүлээһин хайдах туһаныллыбыта эрэ көстөр этэ. Билигин ити уларыйан, холобур, национальнай бырайыагынан кэлбит компьютернай томограф дьоҥҥо төһө туһаны аҕалбыта эбэтэр нэһилиэнньэлээх пууҥҥа тутуллубут оҕо саадыгар оҕолор төһө сылдьаллара барыта көстөр буолуоҕа. Мин санаабар, бу сөптөөх хайысха, — диэн бэлиэтиир Айсен Сергеевич.
Итини таһынан мунньахха Ил Дархан ойуур баһаарыттан сэрэхтээх буолууга сүрүн болҕомтотун уурда. Бу боппуруоска ааспыт нэдиэлэҕэ Уһук Илин эрэгийиэннэргэ боломуочуйалаах бэрэстэбиитэл-РФ бырабыыталыстыбатын бэрэссэдээтэлин солбуйааччы Юрий Трутнев эрэгийиэн салайааччыларын кытары мунньах ыыппыта. Онно кини быйыл эрэгийиэннэргэ федеральнай бүддьүөттэ үбүлээһин лаппа эбиллибитин бэлиэтээбитэ уонна бэлэмнэнии үлэтэ эрдэттэн барыахтааҕын ыйбыта.
Аграфена КУЗЬМИНА,
Андрей СОРОКИН (СИА) хаартыскаҕа түһэриитэ.