Национальнай бырайыактар тутуулара олоххо киириилэрин тула мунньах ааста
Бүгүн Ил Дархан Айсен Николаев национальнай бырайыактар уонна судаарыстыбыннай бырагыраамалар чэрчилэринэн ыыттылла турар тутуулары уонна сөргүтүү үлэлэрин салайар суһал ыстаап мунньаҕын ыытта. Мунньахха хас биирдии тутулла турар эбийиэк туспа ырытылынна.
“Демография” национальнай бырайыак чэрчитинэн тутулла турар уһуйааннар, социальнай эбийиэктэр уонна успуорт тутууларын билиҥҥи туруктарын туһунан “СӨ судаарыстыбыннай сакаасчыт сулууспата” ГКУ генеральнай дириэктэрэ Петр Кушкирин уонна тутуу миниистирин бастакы солбуйааччы Галина Новикова дакылааттаатылар.
“Аҕа көлүөнэ” уонна “Успуорт — олох нуормата” эрэгийиэннэҕи бырайыактар чэрчилэринэн бара турар тутуулар туруктарын туһунан тутар бэдэрээтчиттэр иһитиннэрдилэр. Бу бырайыактарга киирсэллэр: Өлүөхүмэ куоракка тутулла турар 200 миэстэлээх кырдьаҕастар уонна инбэлииттэр дьиэлэрэ, Нам сэлиэнньэтигэр тутулла турар 65 сытар миэстэлээх интэринээт-дьиэ, Бороҕоҥҥо тутуллар элбэх функциялаах успуорт комплекса, Уус Алдан Мындаабатыгар тутуллар 32 миэстэлээх уопсай дьиэлээх күөн көрсүһүүлээх успуорт көрүҥнэригэр аналлаах комплекс.
Ону таһынан, Дьокуускайга, Өлүөхүмэҕэ, Алдаҥҥа, Бороҕоҥҥо, Амма Өнньүөһүгэр, Нам Кириэс Кытылыгар уһуйааннар тутулла туралларын туһунан сиһилии ырытыыны көрдөрдүлэр.
Ырытыыны түмүктээн Ил Дархан тутуу эбийиэктэригэр ыгым балаһыанньа үөскээбэтэҕин бэлиэтээтэ, Бырабыыталыстыба үбүлээһиҥҥэ быһаарыылара ылыллыбыттар, сорох бырайыактар бүддьүөтү көннөрөр таҥыыга көрүллүөхтэрэ диэн эрэннэрдэ.
Сорох болдьохтон хаалан эрэр бырайыактары “СӨ судаарыстыбыннай сакаасчыт сулууспата” хонтуруолга ыларга сорудахтанна, тутулла турар сир усулуобуйатыгар сөп түбэһиннэрэн көмө оҥорорго быһаарыы ылылынна. Айсен Николаев этэринэн, мунньахха таарыллыбыт уустуктар барыта аналлаах министиэристибэлэргэ, олохтоох муниципалитетттарга тиэрдиллэн, үлэҕэ ылыллан сыталлар.
«Саха сирэ» хаһыат, edersaas.ru
Хаартыска sakha.gov.ru