Ил Дархан Айсен Николаев Кэбээйи улууһугар оробуочай сырыытын кэмигэр Кэбээйи суолун тутуутун көрдө-иһиттэ.
edersaas.ru
«Кэбээйи» суолун тутуу өссө аан бастаан 90-с сылларга саҕаламмыта. Суол эрэгийиэннээҕи таһымнаах. Бүтэһик икки сылга суолу тутуу тэтимирдэ.
Ол курдук, 2019 сылга 13 км суол оҥоһулунна. Бу сыл сэтинньитигэр уопсайа 25 км уһуннаах үс учаастак үлэҕэ киллэриллиэхтээх: Бэс Күөлэ – 95 км, 108 км – Түгэнэ үрэх уонна Түгэнэ үрэҕи туоруур муоста. Санатан эттэххэ, дойду аҕа баһылыга Владимир Путин көҕүлээһининэн киллэриллибит «Куттала суох уонна хаачыстыбалаах суоллар» национальнай бырайыагар олоҕуран маннык хамсааһын таҕыста. Национальнай бырайыактар үлэҕэ киллэриллиэхтэриттэн суолу тутууга эрэ буолбакка, дьиэни-уоту тутууга сэргэхсийии тахсыбытын бары көрө-билэ сылдьабыт.
«Бу сылга хайаан даҕаны Кэбээйи сэлиэнньэтигэр диэри сылы эргиччи айан-сырыы олохтонуо диэн бүк эрэллээхпин. Онон бу Кэбээйи улууһугар кэтэһиилээх уонна күүтүүлээх дьоһун суолталаах түгэн буолар. Суол толору күүһүнэн үлэҕэ киллэрилиннэҕинэ олохтоохтор куоракка биэс чааһынан тиийэр кыахтаныахтара», — диэн Ил Дархан бэлиэтээн эттэ.
Айсен Николаев үлэ салгыы ыытыллыаҕын туһунан эттэ. Ол курдук өрөспүүбүлүкэ салалтата Кэбээйиттэн Мукучуга диэри суолу тутар былааннааҕын иһитиннэрдэ.
«Нэһилиэнньэ бу боппуруоһу туруорсар. Кэбээйиттэн Мукучуга диэри 180 км. Мукучуга диэри суол тутулуннаҕына, суолу бата олорор бөһүөлэктэри эмиэ ситимниэҕэ», – диэн тоһоҕолоон бэлиэтээтэ.
edersaas.ru