Национальнай бырайыак: «Нам» суолун саҥардан оҥорууну эрдэ бүтэрэргэ бэлэмнэр
«Нам»эрэгийиэннээҕи суолу саҥардан оҥоруу тэтимирдэ. Айан суолун кэҥэтии «Куттала суох уонна хаачыстыбалаах суоллар» национальнай бырайыак чэрчитинэн ыытыллар.
«Бүгүн «Дороги Саха» бэдэрээтчит тэрилтэ түргэн тэтиминэн оҥорор. Үлэни былааннаммыт болдьоҕуттан эрдэлээн 2022 сылга бүтэриэхпит диэн эрэнэбит«, — диэн бэлиэтээтэ «СӨ Управтодор» тэрилтэ хапытаалынай тутууга отделын начаалынньыга Лидия Птицына.
Суол үлэтэ 11 +400 — 18+500 км суол учаастагар Жатай бөһүөлэккэ киириигэ диэри ыытыллар. Учаастак начаалынньыга Гаврил Рожин этэринэн, быйыл 3,5 км суолу туттарыахтаахтар. От ыйыгар суол бу чааһыгар асфальт бетону икки хат кутуохтара.
Билигин ууну аһарар турбалары буорунан көмтүлэр, кутуу суол кытыытын оҥороллор. Эбийиэккэ самосваллар, грейдердэр, бульдозердар уонна экскаватордар үлэлииллэр.
Санатан эттэххэ, үлэлэр Дьокуускай куорат сирин кэҥэтиинэн өрөспүүбүлүкэ Тырааныспарка министиэристибэтин былааныгар киирбиттэрэ. «Нам» массыына суолун реконструкциялааһын ы 4 балаһаҕа диэри улаатыннарыы 7 км-тан 21-с км диэри светофордары, оптуобус тохтобулларын, суол бэлиэлэрин, тас уотун туруоран, түһүмэхтэринэн ыытыллыаҕа.
edersaas.ru