Бэҕэһээ “Саха” НКИК ханаалыгар өрөспүүбүлүкэ баһылыга Айсен Николаев бу сылга туох үлэ-хамнас барбытын, ол түмүктэрин Саха сирин олохтоохторугар билиһиннэрдэ.
Саха сиригэр суолу тутуу уонна оҥоруу тэтимнээхтик ыытылларын дьон-сэргэ билэ-көрө сылдьар. Суолу оҥоруу боппуруоһугар тохтоон Ил Дархан Айсен Сергеевич маннык эттэ:
— Бу сэтинньигэ Дьокуускай куорат мээрэ Евгений Григорьевтыын Объездной шоссены арыйыыга кыттыбыппыт. Сүрүн уулуссабыт — Ленин проспега оҥоһулла сылдьар. Суолу тутууга барар үлэлэр тустарынан кэпсээтэххэ маннык. “Куттала суох уонна хаачыстыбалаах суоллар” национальнай бырайыак чэрчитинэн суолу тутууга үлэ ыытыллар. Ол курдук, 500 км федеральнай, муниципальнай суоллар оҥоһулуннулар. Аҕыйах сыллааҕыта 200 км этэ. Сүрүннээн федеральнай суоллар тутуллар этилэр. Дьокуускайга тохтоотоххо, 49 км суол. Эрэгийиэннээҕи Нам, Покровскай суолларын кытта быйыл Дьокуускайга көрдөрүүнү улаатыннардыбыт – 70 км куоһарда. Эрэгиийэн суолларыгар 230 км былааны толордубут. Кэлэр 2022 сылга Дьокуускайга 43 км суол оҥоһуллуоҕа. 500 км суолу оҥорон, рекорд олохтуохтаахпыт.
Салгыы эмиэ кэрэспэдьиэнниин тырааныспар боппуруоһун таарыйбыттараОнуоха кини көтүүнү субсидиялааһыҥҥа үгүөрү үп көрүллэрин эппитэ.
— Бу Саха сирин олохтоохторугар олох суолталаах бырагырама. Ол эрээри Тырааныспар министиэристибэтэ Дьокуускай куораты өйдөммөт биричиинэнэн бырагыраамаҕа киллэрбэтэҕэ. Ону күүскэ туруорсаммын, көрүлүннэ. Билигин Уһук Илиҥҥэ үп көрүлүнэ, ону бу күннэргэ тыырыахтара. Онон 2022 сылтан Дьокуускайтан, Нерюнгриттэн, Мииринэйтэн Москваҕа, Санкт Петербурга Саха сирин олохтоохторо субсидиянан туһанан көтөр кыахтаныахтара, — диэбитэ өрөспүүбүлүкэ баһылыга.
Бэлэмнээтэ Женни Стрюкова.